A është Pep Guardiola më i miri i historisë? Përgjigja sidomos në sport, disiplinë emocionale dhe pasionante, është e ndryshme. Por po t’i referohesh të dhenave që s’gënjejnë, ai u bë tekniku me më shumë tituj. As Murinjo dhe as Ançeloti nuk paraqesin më rrezik… Dhe me skuadrën që ka ndërtuar, e milionat e sheikëve pas, s’ka më strateg që e ndalon në këto kushte dhe rrethana. Ndoshta në një të ardhme të largët. Gati 30 tituj të fituar, mes tyre 3 Champions. I pari trajner që fiton dy tripleta në skuadra të ndryshme. E kush nuk do e kishte zili! Pas Barcelonës 2008-2009, tani me Manchester City sezoni 2022-2023.
Dje rreth mesnatës së shtunë pritja mori fund, edhe pse mes drithërimave dhe një paraqitjeje zhgënjyese të anglezëve, që po të mos ishte për Lukakun dhe tersin e tij, edhe mund ta kishin humbur finalen e dytë në tre vite. Për herë të parë në historinë e klubit Manchester City është shpallur kampione Europe. Klubi i sheikëve i drejtuar nga Pep Guardiola arriti të mposhtte në finalen e Champions League të zhvilluar në Stamboll Interin me rezultatin 1-0. Italianët përkundër pritshmërive u paraqitën mjaft dinjitoz në fushë, ndërsa episodi që përcaktoi ndeshjen më të rëndësishme të futbollit europian ishte në minutën e 68 nga Rodri.
Më këtë triumf Guardiola u bë trajneri i parë në histori që fiton tripletën me dy klube pas Barcelonës, ndërsa për Interin kjo ishte finalja e 6 në histori. Pas ndeshjes trajneri spanjoll i City-t deklaroi ‘se më fund ia arriti ta fitojë këtë trofe të vështirë’, ndërsa me shaka i kërkoi Realit ta ketë frikë, pasi për pak vite do ti afrohet ndjeshëm.
Sakaq trajneri i Interit Simone Inzaghi tha se ‘futbollistët e tij u treguan të magjishëm’, ndërsa kërkoi vazhdimësi që këtë sezon ta përsërisin edhe në të ardhmen. As presidenti Zhang nuk e bëri dramë, duke deklaruar se ‘është krenar për ekipin’ dhe sa ‘ka nisur punë për të ndërtuar një Inter më konkurues sezonin e ardhshëm’.
