Në konferencën e zhvilluar për mediat, në lidhje me shkatërrimin e dy grupeve kriminale të trafikut të drogave të forta, kreu Policisë së Tiranës, Tonin Vocaj, është ndalur edhe tek ecuria e hetimeve për atentatin e ndodhur në “Don Bosko”, që i mori jetën 58-vjeçares Mimoza Paja. Lidhur me hetimet që po kryhen për ngjarjen e 12 marsit, Vocaj tha se policia ka informacione mbi persona konkretë të përfshirë në krimin e rëndë, që kishte shënjestër hakmarrjeje Fatjon Muratin, por për shkak të sekretit hetimor nuk ka dhënë detaje më shumë. Besohet se është ndërtuar edhe identikiti i një prej atentatorëve që gabuan shënjestër dhe për pak sa nuk shkaktuan një masakër më të madhe me të pafajshëm. Kurse si organizator besohet se bëhet fjalë për grupin e biznesmenit të shumëkërkuar dhe të zhdukur pa gjurmë prej 8 gushtit 2022, Ervis Martinaj.
“Vazhdon të funksionojë një grup hetimor nën drejtimin e prokurorit, i cili do të marrë kohën e nevojshme. Policia ka informacione edhe për persona konkretë të përfshirë në këtë ngjarje, por për shkak të sekretit hetimor nuk mund të japim detaje, por kur të kemi përparime do ia bëjmë me dije mediave dhe publikut”, deklaroi Vocaj.
Ngjarja e rëndë ndodhi më 12 mars, në lokalin e Fatjon Muratit, ku humbi jetën banakierja Mimoza Paja, teksa u plagosën 5 persona të tjerë, ndërmjet tyre mbesa 10 vjeçare e viktimës, si dhe xhaxhai i Fatjon Muratit. Në fshatin Likmetaj ekzekutorët dogjën makinën që përdoren në atentat. Murataj ishte larguar disa orë para jashtë vendit, me itinerar Kosovën dhe më pas Turqinë, i ndihmuar nga dy miqtë e tij të ngushtë, Gentian Reçi dhe Endrit Dokle.
