Firdeus Berberi, njëri prej personazheve kryesorë që ka marrë pjesë në sulmin me thikë dhe pistoletë, me qëllim ekzekutimin e Johan Muçllarit, është marrë i pandehur nga Prokuroria e Pogradecit. Në total janë 7 të pandehur për ngjarjen e ndodhur në muajin Prill 2022, ku u sulmua Muçllari. Por asnjëri prej tyre nuk ndodhet në burg. 6 të pandehur janë hetuar dhe do gjykohen në gjendje të lirë. Kurse personi kryesor, Firdeus Berberi, i thirrur dhe “Djali i Lilit të Rrushkës”, rezulton në kërkim dhe ende nuk është kapur nga Policia e Shtetit. Çështja kundër 6 personave pritet të gjykohet në seancë paraprake nga gjyqtarja Luljeta Kolonja. Ndërsa për një person tjetër të quajtur Rudi Shaho, prokuroria ka vendosur të pushojë ndjekjen penale për akuzën e “moskallëzimit të Krimit” dhe “përkrahjes së autorëve të krimit”. Por përveç kësaj vepre penale, ndaj Berberit është ngritur dhe akuza e “mbajtjes pa lejë të armëve të zjarrit” si dhe “prishjes së qetësisë publike”. Në dosje evidentohet se Berberi, ka qëlluar 4 herë me armë në drejtim të Johan Muçllari, duke i shkaktuar dëmtime në pjesën e këmbës. Në pamundësi për ta vrarë me pistoletë, teksa Johan Muçllari, ndodhej i shtrirë në rrugë, Firdeus Berberi, e ka sulmuar sërish, por këtë herë me thikë. Për përkrahjen e autorit të krimit, Firdeus Berberi, prokuroria e Pogradecit ka marrë të pandehur dhe shokët e tij; Fatjon Bono, Ledian Shkulaku, Kristian Kreste, Hekuran Gjona dhe Bledar Berberi.
Atentati ndaj Johan Muçllarit, merret i pandehur djali i ‘Lilit të Rrushkës’ dhe 6 shokët e tij, dosja dërgohet për gjykim
