Spitalet publike do të mund të aplikojnë tashmë për të fituar autonominë menaxheriale dhe atë financiare. Dikasteri i Shëndetësisë ka zyrtarizuar formularët që çdo strukturë spitalore publike do të duhet të plotësojë për të marrë secilin nga këto statuse, teksa ka miratuar edhe skemën e vlerësimit me pikë të treguesve që do të përfshihen në procesin e vlerësimit.
Urdhri i miratuar përcakton se në secilin rast, komisioni për vlerësimin e përmbushjes së kritereve për përfitimin e autonomisë menaxheriale, apo asaj financiare do të bëhet me sistemin e pikëzimit prej 100 pikësh. Për secilin tregues është konfirmuar edhe totali i pikëve me të cilat do të bëhet vlerësimi për çdo spital.
Lidhur me vlerësimin për dhënien e autonomisë menaxheriale, gjashtë janë treguesit që do të përfshihen në procesin e vlerësimit. Referuar skemës së pikëzimit për secilin tregues, bëhet e ditur se akreditimi i spitalit vlerësohet maksimalisht me 5 pikë, strategjia 3-vjeçare për zhvillimin e shërbimit spitalor do të vlerësohet me 15 pikë, raport i aktivitetit spitalor dhe indikatorëve të performancës për çdo shërbim për 3 vitet e fundit do të vlerësohet maksimalisht me 20 pikë, treguesit spitalorë do të vlerësohen me 30 pikë, protokollet dhe udhërrëfyesit mjekësorë 10 pikë, raporti mbi shfrytëzimin e kapacitetit spitalor do të vlerësohet me 10 pikë, teksa po kaq do të jetë vlerësimi me pikë edhe për treguesin e fundit që është propozimi për përmirësimin.
Ndërsa për autonominë menaxheriale vlerësimi do të bëhet duke u mbështetur në tetë tregues. Sipas skemës së përcaktuar për këtë rast, aplikimi i autonomisë menaxheriale për 2 vjet vlerësohet me 10 pikë, strategjia 5-vjeçare e zhvillimit të spitalit, menaxhimit financiar dhe investimeve me 15 pikë, indikatorët e performancës për mbulimin e shërbimit mjekësor për 3 vitet e ardhshme me 25 pikë, rregullorja ekonomiko– financiare 25 pikë, paketat bazë shëndetësore të kostifikuara 10 pikë, plan veprimi për optimizimin e kapaciteteve për të gjeneruar të ardhurat dytësore 5 pikë, mbulimi i mbi 70 për qind të nevojave për kujdes shëndetësor në territorin që ai mbulon 5 pikë si dhe raport i situatës së qëndrueshme financiare për 3 vitet e fundit 5 pikë.
Komisioni i posaçëm vlerëson dokumentacionin e kërkesës së paraqitur brenda 60 ditëve nga dorëzimi i saj. Në rast të konstatimit të përmbushjes së kritereve për përfitimin e autonomisë, sipas përcaktimeve të bëra në këtë rregullore, i propozon ministrit dhënien e kartës së autonomisë me fushën përkatëse.
Në rregulloren e zbardhur më herët janë përcaktuar edhe rastet në të cilat do të propozohet shfuqizimi i autonomisë së fituar. Konkretisht bëhet e ditur se ministri përgjegjës për shëndetësinë, me propozim të komisionit të posaçëm shfuqizon kartën e autonomisë spitalore kur: konstatohet mosplotësim i kritereve, për të cilat i është dhënë karta e autonomisë. Konstatohet që spitali nuk ka përmbushur aktivitetin spitalor, sipas indikatorëve të performancës për veprimtarinë klinike, për të cilat financohet Konstatohet që nga ana e spitalit, që ka përfituar kartën e autonomisë, janë shkelur akte ligjore e nënligjore në fuqi. Pas këtyre konstatimeve dikasteri i shëndetësisë njofton me shkrim spitalin autonom për fillimin e procedurave për shfuqizimin e kartës së autonomisë spitalore, duke shprehur qartësisht arsyet e shfuqizimit, respekton të drejtën e spitalit autonom për dhënien e shpjegimeve, kontestimeve, sqarimeve me shkrim, brenda 20 ditëve nga data e marrjes së njoftimit për fillimin e procedurave për shfuqizimin e kartës së autonomisë spitalore. Me qëllim mbrojtjen e interesit publik kur është rasti, komisioni përgjegjës për autonominë mund t’i japë spitalit autonom 30 ditë kohë, pas përgjigjes së tij me shkrim, që të veprojë në përputhje me kushtet e kartës së autonomisë spitalore dhe të shmangë shkakun për shfuqizimin e saj. Në rastin kur spitaleve u shfuqizohet karta e autonomisë, spitali kthehet në statusin e mëparshëm.
p.k\dita
