Talo Çela po gjykohet në mungesë në Gjykatën e Posaçme, në një dosje të ndarë për grabitjen e bujshme të rreth 6 milionë eurove në aeroportin e Rinasit, më 9 prill të vitit 2019.
Në fazën aktuale, SPAK dhe mbrojtja kanë thirrur si dëshmitarë punonjës të aeroportit, por dhe një berber. Avokati i Talo Çelës, Luan Kaloçi, thotë se nuk është takuar asnjëherë më klientin e tij dhe prokurën për përfaqësim e ka firmosur me kërkesë të Bujar Çelës, vëllait të Talos, para se ai të ekzekutohej në Bradashesh, nga Nuredin Dumani.
Gjatë kësaj kohe, Çela interesohej nëpërmjet personave të ndryshëm për këtë proces gjyqësor dhe disa herë me anë të ndonjë mesazhi me numra të huaj, por që prej arrestimit të Nuredin Dumanit në 30 mars të vitit të kaluar, ai ka humbur çdo kontakt. Për avokatin e tij nuk përjashtohet mundësia që të jetë eliminuar fizikisht. Nga ana tjetër, nga hakimi i e-maile-ve të ish-drejtorit të Policisë Gledis Nano, rezultoi se policia kishte informacione në rrugë operative se Talo Çela, edhe pse i shumëkërkuar nga SPAK, lëvizte në Tiranë me një automjet luksoz “Audi A8”.
