Bankierët e fshehtë: Hetuesi belg zbërthen skemën gjigande të lëvizjes të parave me WhatsApp

Një rrjet ndërkombëtar i transferimit informal të parave dyshohet se ka lëvizur qindra milionë euro në cash, duke përdorur një grup të madh në WhatsApp për të koordinuar transaksionet në vende të ndryshme të botës.

Hetimi i kryer nga një rrjet transmetuesish europianë ka zbuluar se sistemi është përdorur jo vetëm për transferime financiare, por edhe në aktivitete të lidhura me krimin e organizuar, trafikimin e drogës dhe njerëzve, si dhe financimin e ekstremizmit.

Në qendër të hetimit është një grup WhatsApp me emrin “Traders of Greater Europe”, i cili kishte 532 anëtarë dhe përdorej për të organizuar marrjen dhe dorëzimin e shumave të mëdha parash në qytete të ndryshme. Mes destinacioneve të përmendura ishin edhe Londra dhe Birmingham. Një prej rasteve të zbuluara lidhet me para të nisura nga Brukseli, të cilat dyshohet se përfunduan te persona të lidhur me Shtetin Islamik (ISIS) në Siri.

Mbi 82 mijë mesazhe

Hetuesit gjetën më shumë se 82 mijë mesazhe të shkëmbyera në grup gjatë periudhës nga fundi i shkurtit deri në dhjetor 2022. Grupi u zbulua nga hetuesi belg Vincent Guerra, i cili po hetonte një dosje për financimin e terrorizmit. Sipas tij, përmasat e transaksioneve ishin jashtëzakonisht të mëdha dhe rrjeti kishte shtrirje ndërkombëtare.

Komunikimet zhvilloheshin edhe në gjuhën arabe dhe përdoreshin për të koordinuar pagesa cash përmes sistemit të njohur si “hawala”.

Çfarë është “hawala”?

Hawala është një mënyrë tradicionale dhe informale për transferimin e parave, e bazuar te ndërmjetës të besuar. Ndryshe nga sistemi bankar, paratë nuk kanë nevojë të transportohen fizikisht nga një shtet në tjetrin dhe transaksioni mund të mos lërë gjurmë të zakonshme elektronike. Mekanizmi përdoret ligjërisht në shumë vende, veçanërisht nga emigrantët që dërgojnë para te familjarët në zona ku shërbimet bankare janë të kufizuara. Por pikërisht mungesa e gjurmëve bankare e ka bërë hawala-n tërheqëse edhe për organizatat kriminale dhe grupet ekstremiste.

Sipas hetimit belg, grupi WhatsApp përdorej kryesisht për transaksione mbi 5 mijë euro, ndërsa disa prej pagesave kapnin shifra shumë më të larta.

Autoritetet zbuluan prova se një pjesë e parave dërgoheshin drejt Sirisë për të mbështetur familjet e militantëve të ISIS-it, përfshirë gra të mbajtura në kampe paraburgimi.

Pas arrestimit të një personi të identifikuar si Abu Adam, i dyshuar si një prej drejtuesve të rrjetit në Bruksel, hetuesit gjetën në telefonin e tij grupin WhatsApp dhe një sasi të madhe të dhënash.

Në pajisje u gjetën rreth 6 mijë fotografi të kartëmonedhave 5-euroshe, ku dukeshin numrat serialë, si dhe rreth 6 mijë fotografi dokumentesh identiteti. Sipas hetuesve, këto materiale përdoreshin për identifikimin dhe verifikimin e transaksioneve. Vetëm të dhënat e gjetura në telefonin e Abu Adam sugjerojnë se ai mund të ketë përpunuar rreth 12 mijë transaksione.

Hetimi më pas u zgjerua përtej financimit të terrorizmit, duke nxjerrë në pah dyshime për përdorimin e të njëjtit sistem në aktivitete të tjera kriminale. Në vitin 2024, një gjykatë belge dënoi gjashtë persona për pastrim parash, mes tyre Abu Adam dhe një tjetër person të konsideruar pjesë e drejtimit të rrjetit.