Barcelona ka realizuar dy huazime të rëndësishme në fund të merkatos verore, Joao Felix është afruar nga Atletico Madrid dhe Joao Cancelo është afruar nga Manchester City.
“Ëndrra është bërë realitet”, kështu e njofton Barcelona zyrtarizimin e Joao Felix, i cili zbarkon në Katalonjë si huazim për një sezon nga Atletico Madrid, me sulmuesin që nuk ishte në planet e “colchoneros” pas huazimit vitin e kaluar te Chelsea.
Kështu portugezi do të luajë sërish në La Liga, por tashmë me skuadrën që e ka dëshiruar që fëmijë, siç thotë ai vetë: “Ishte ëndrra ime qëkur kam qenë fëmijë”. Ndërkohë edhe Joao Cancelo transferohet nga Manchester City te Barça në formë huazimi deri në verën e 2024-ës. Cancelo nuk ishte në planet e Guardiolës dhe pas përfundimit të huazimit te Bayern Munich gjeti skuadrën e re, Barcelonën.
Randal Kolo Muani do të luaj përsëri në Bundesliga te Eintracht Frankfurt. Sulmuesi ishte objektivi kryesor i Paris Saint-Germain, por kampionët e Francës nuk ia dolën që të bindnin drejtuesit e Frankfurt, me këta të fundit që kërkuan plot 100 milionë euro dhe në asnjë moment nuk ulën pretendimet e tyre.
PSG ofroi edhe dy lojtarë, Pembele dhe Ekitike, por “Shqiponjat” nuk pranuan dhe sulmuesi do të qëndrojë përsëri në Gjermani, pasi tashmë edhe afati i transferimeve është mbyllur zyrtarisht. Francezi kërkoi me ngulm transferimin drejt Parisit, madje doli hapur në mediet gjermane, por tani i duhet të presë ende për të veshur fanellën e PSG-së.
Sipas medieve franceze, parizienët u fokusuan totalisht te Mbappe, ndërsa morën konfirmimin nga Kylian, ata e ulën përqendrimin në aksin Paris-Frankfurt, ndaj ky operacion dështoi, por nuk përjashtohet mundësia që Kolo Muani të jetë përsëri kryefjalë duke nisur nga merkato e dimrit.
