Teksa janë mbajtur ceremonitë mortore të Migena Sinanit dhe Roland Sinanit, ka ardhur edhe reagimi i bashkëshortit të së ndjerës, Erjon Sinani. Ai është shprehur në një intervistë për “ABC” se kjo është një ngjarje makabre që ka ndodhur në shtëpinë e tij. Pohon se nuk ka qenë në shtëpi në momentin e ngjarjes dhe lajmin e ka marrë vesh nga prindërit, të cilët i kanë thënë se në shtëpinë e tyre ka ndodhur hataja. “Kam 5 vite i martuar kemi dy fëmijë, djalin 4 vjeç dhe goca afër dy vjeç si ka mbushur akoma. Nuk ndodhesha në shtëpi, isha në punë dhe më erdhi një mesazh nga prindërit, i kishin rënë telefonit, por nuk punonin linjat. Kur mora mesazhin i mora në telefon dhe më thanë se hataja e madhe kishte ndodhur, janë vra dy vetë në shtëpinë tonë.
Ç’të shihja, policia, gjak, vëllanë të shtrirë në tokë. Gjendja e tij ka qenë normale, ka qenë dikur në depresion por kohët e fundit ka qenë mirë”, ka thënë ai. Lidhur me marrëdhënien mes gruas së tij të ndjerë dhe të vëllai, Sinani thotë se nuk kishin konflikte, ndërsa të dy punonin fortë, për të siguruar të ardhura për një jetesë më të mirë. Apeli i vetëm që ka, është ndihma për të rritur dy fëmijët e mitur jetimë.
Pjesë nga intervista:
Ju punoni taksist, gjithmonë natën?
Po natën, punoja natën për fëmijët, po mundoheshim me mbledh pak lekë më i siguri jetesë shtëpia është e amortizuar komplet, ka shumë lagështirë.
Mendoni se kushtet e vështira e kanë çuar në këtë akt vëllanë tuaj?
Nuk di ça të them.
A punonte ai?
Po, shumë punonte, për të siguruar lekë dhe për të blerë një shtëpi.
Keni një apel? Për shkak të asaj ç’ka ndodhi, një ndihmë për fëmijët tuaj?
Një shtëpi të jetoj normal, që fëmijët mos më sëmuren.
Migena ka pasur konflikte?
Jo nuk ka pasur probleme. Nuk e di si ndodhi.
Po fëmijët?
Fëmijët ndodhen te njerëzit e nuses. I mbajnë ata. Janë të vegjël, s’e kuptojnë këtë gjë. Lodra duan, shëtitje. Ata më kanë dhënë mbështetje të plotë. Ata kanë mbetur tani.
