Reagimet e kreut të opozitës Sali Berisha ndaj dosjes së ish-agjentit McGonigal, sipas sekretarit për Çështjet Vendore në PD, Roland Bejko tregojnë standard të dyfishtë ndaj SHBA-ve.
Bejko shkruan në një postim në facebook se Berisha e di mirë që me SHBA s’bëhet shaka jo vetëm kur flitet për Ramën, por edhe për të.
“Berisha e di që me miellin e amerikanit nuk bëhet shaka, por ama, vetëm kur flitet për Ramën. Kur flitet për të, ai është përfaqësues i popullit sovran dhe nuk pyet ça thot Amerika.. Ose, përndryshe, harron që amerikanët e kanë shpallur “Non Grata” duke i kujtuar vazhdimisht atij dhe mbështetësve të vet, që të kenë kujdes se me miellin e amerikanëve, nuk bëhet shaka.
Nisur nga deklaratat e Berishës për protesta të organizuara me qëllim largimin e Ramës nga pushteti, përfaqësuesi i PD Roland Bejko i quan ëndërra me sy hapur.
“Ça kujton ky dhe ata që i shkojnë pas, se amerikanët do rrëzojnë Ramën për të kthyer Berishën?! Kur shikon shumë ëndra me sy hapur, bashkëjeton me to dhe të duken si të vërteta pastaj. Kështu po u ndodh dhe këtyre të foltores. Harojeni pushtetin sa të jetë Berisha nga ajo anë. Ramën nuk e heqin se nuk kanë me kë e zëvendësojnë. Një opozitë e re, pa Berishën, Ramën e çon për skrap brenda disa muajve”, shkruan Bejko.
m.b./dita
