Një biznesmen italian nga Caserta po përballet me një rrezik dënimi në burg, për shkak të një mjeti luksoz që ia vodhën dhe që duket se ka përfunduar në duart e trafikantëve në Shqipëri.
Ai kishte marrë me qira një “Porsche”, e cila më pas i është vjedhur, të paktën kështu ka denoncuar në polici. Ndaj tij është ngritur akuza e simulimit të një krimi, për shkak se denoncimi është bërë kur makina kishte disa ditë që ishte zhdukur. Nga hetimet ka rezultuar se në ditën e denoncimit, mjeti luksoz “Porsche” ishte transferuar tashmë në Shqipëri. Ndaj tij rëndon akuza për simulimin e një krimi si edhe është në gjyq edhe për përvetësim, duke qenë se nuk ia ka kthyer kompanisë makinën me qira. Sipas avokatit Francesco Moscatiello, të dyja akuzat ndaj sipërmarrësit nuk janë të denja për dënim, pasi vonesa e ankimit nuk mund të çojë, përsëri sipas tezës së mbrojtjes, në një dënim për simulim pasi ai ka qenë viktimë e një vjedhjeje.
