Blendi Klosi është prezantuar ditën e sotme para strukturave të Partisë Socialiste në Vlorë, si drejtues i këtij Qarku, teksa shoqërohej nga Sekretari i Përgjithshëm i PS-së Damian Gjiknuri.
Vendimi për emërimin e Klosit si drejtues i Qarkut të Vlorës u mor në mbledhjen e Kryesisë së Partisë Socialiste, teksa kryeministri Edi Rama “zhveshi” nga çdo funksion në PS, Arben Ahmeatj. Klosi ka qenë edhe më parë drejtues politik në Vlorë, në vitet 2007-2009.
Ajo që u vu re në takimin e sotëm me strukturat e Vlorës, ishte pikërisht mungesa e Ahmetajt, teksa i pyetur nga gazetarët Gjiknuri tha se ai ishte lajmëruar për të qenë prezent në takimin e sotëm.
Lidhur me mungesën e Arben Ahmetajt në Vlorë, deputeti Damian Gjiknuri tha se për këtë është përgjigjur edhe kryeministri Edi Rama.
“Për këtë është përgjigjur edhe Kryeministri. Këto janë lëvizje normale përpara para fushatave zgjedhore, ku secili merr pozicionin e tij si lojtar, që ekipi të japë maksimumin. Ahmetaj është lajmëruar për takimin e sotëm por mesa di ka qenë i angazhuar me punë. Besoj se Klosi do të vazhdojë punët e mira të nisura për sa i përket mirëmenaxhimit dhe mirëorganizimit politik të këtij qarku”, tha Gjiknuri.
Në mbledhje, mungoi kryebashkiaku Dritan Leli, teksa Klosi shtoi se Partia Socialiste ka detyrë që të jetë bashkë me qytetarët.
“Për këdo socialist është një nder i madh të bësh jetën e partisë në Vlorë. Për të arritur të njëjtat rezultate që kjo parti ka arritur gjatë gjithë periudhën post-tranzicionit. Partia, e cila që dëshmuar të dalë të jetë e suksesshme sepse ka qenë bashkë. Detyra jonë është që ne të jemi bashkë me qytetarët. Vlora si një qark i madh ka nevojë për shumë.
Mos u përpiqni të ndani popullin. Vlerësimi për gjithësecilin bëhet si u shërben qytetarëve. Shumë shpejt do të fillojmë procedurat për punën e kryetarëve të bashkive në të gjithë vendin”, u shpreh Klosi.
Voxnews ka raportuar më herët se pas largimit nga Qeveria në të njëjtën kohë që Ilir Meta përfundonte mandatin e Presidentit, Arben Ahmetaj i kishte të numëruara edhe ditët në krye të PS-së së Vlorës. Aq e thellë ishte përçarja e mbjellë prej tij në këtë qark, sa as vetë deputetët socialistë me njëri-tjetrin nuk kishin komunikim normal.
Situata e krijuar e bënte të pashmangshëm largimin e tij para zgjedhjeve vendore të vitit të ardhshëm.
a.m/dita
