Si po eliminohen “krahët” e Ervis Martinajt! Nga shoku i ngushtë te kushëriri dhe të tjerë…

Opinioni publik u trondit sërish mbrëmjen e djeshme kur në një atentat në Milot mbeti i vrarë i riu Klisman Preçi, ndërsa u plagos rëndë Ylli Brahimi i cili aktualisht ndodhet në spitalin e Traumës në gjendje kritike.

Ky është atentati i dytë që kryhet brenda 6 ditëve. Të dyja ngjarjet duket se kanë lidhje me një larje hesapesh mes grupeve kriminale të njëjta.

Ylli Brahimi njihet si krah i grupit të Ervis Martinajt, të cilit i vranë edhe nipin bashkë me dy miqë të tij në Fushë Krujë.

Duket se Klisman Preçi dhe Ylli Brahimi i ruheshin një atentati. Ata lëviznin me një “Toyta” të blinduar, por vrasësit kanë gjetur momentin kur ata sapo po zbrisnin nga makina e tyre pranë banesës dhe kanë hapur zjarr.

Mësohet se e njëjta makinë “Toyota” e blinduar është parë edhe në varrimin e Brilant Martinajt në qytetin e Laçit.

Klisman Preçi dhe Ylli Brahimi po qëndronin poshtë banesës në Milot, ndërsa u përballën nga breshëria e plumbave të atentatorëve.

Të dy janë persona të njohur për drejtësinë shqiptare, ku Ylli Brahimi është i përfshirë në biznesin e lojërave të fatit, i dënuar për trafik lëndësh narkotike, ndërsa Klisman Preçi ka precedent penal për grabitje me armë.

Gjithashtu, në gusht të vitit 2019 në Tiranë u ekzekutua ish polici Santiago Malko, ndërsa në hetimet e SPAK nënvizohet se plani ishte edhe vrasja e Ervis Martinaj. Për këtë vrasje, u dënua vetëm Bledi Teta me 25 burg. Në kërkim janë Leonard dhe Erlis Duka dhe disa persona te tjerë të cilët kishin rol në këtë organizimin dhe ekzekutimin e Malkos.

Ndërsa në 13 nentor te vitit të kaluar po në Tiranë do ekzekutohej Erigers Mihasi, i cili njihej si shok i ngushtë i Ervis Martinajt, ndërsa viktima tjetër Armando Dumani pasagjeri që ndodhej me të në Audin e bardhë, rezulton se është fqinj i tij në Yrshek.

a.m/dita