Dhjetra furgonë me policë nga FNSH, Shqiponjat dhe Renea kanë rrethuar godinën e Kryeministrisë, pak orë para nisjes së protestës së opozitës.
Nga rruga “Ismail Qemali” deri te bulevardi “Dëshmorët e Kombit” dhe përgjatë rrugës “Papa Gjon Pali II”, janë vendosur dhjetra furgonë të policisë, të pajisur edhe me mjetet anti protestë.
“Rrethimi vazhdon edhe përgjatë “Piramidës”, teksa Kryeministria pritet të jetë pikërisht vendi ku do të mblidhen protestuesit si fillim.
Lidhur me tubimin që është planifikuar të zgjasë 4 orë, sipas lejes së marrë nga Partia Demokratike, Policia e Shtetit ka publikuar edhe një plan masash.
Bëhet me dije se rreth 1500 forca policie do të jenë në terre, duke nisur nga ato të rendit, FNSH, Shqiponjat do të jenë në terren për mbarëvajtjen e protestës. Në gatishmëri do të jenë edhe forcat RENEA.
Ndërkohë sot dyert e kryeministrisë janë të “blinduara”, ndërsa instalacioni i kërpudhës që ndodhet në lulishten e këtij institucioni është hequr.
Në protestë të gjithë efektivët do të jenë të pajisur me maska kundragaz. Do të ketë edhe 5 autobotë me ujë nëse do të ketë nevojë në raste incidentesh. Në terren do të përfshihen edhe agjentët civilë, për të monitoruar mbarëvajtjen e protestës.
Në shtyllat përballë me kryeministrinë janë vendosur kamera monitorimi me rezolucion të lartë, pak orë para nisjes së protestës së opozitës. Ndërkohë, me qëllim që qytetarët të mos shkulin kamerat, shtyllat janë lyer me graso. Pak më herët, Sekretari i Përgjithshëm i PD-së Flamur Noka zhvilloi një takim me drejtuesit politikë dhe grupin parlamentar lidhur me zhvillimin e protestës.
Skenarët dhe plani po mbahen sekret dhe PD është treguar shumë diskrete në mënyrë që informacioni të mos mësohet nga policia.
i.b./dita
