Bllokimi i juglindjes, Rama shkon në rrugën provizore, i quan akuzat për korrupsion “perversitete”

Kryeministri Edi Rama ka inspektuar rrugën provizore të aksit Librazhd-Prrenjas, e cila u hap pasi juglindja kishte mbetur e bllokuar.

Ai shoqërohet nga ministri i ri i Infrastrukturës dhe Energjisë, Enea Karakaçi dhe ministri për Pushtetin Vendor, Ervin Demo.

“Gjithë tollovia e madhe që u shemb rruga është një perversitet shumë i madh sepse këtu jemi në aksin e ri. Aksi i ri nuk është i ndërtuar këtu, gjurma është këtej nuk ka lidhje me atë atje. Kjo është një rrëshqitje e shkaktuar nga shirat”, u shpreh ai.

Pasi Karakaçi shpjegoi se kontrata parashikon edhe mbrojtjen lumore, Rama tha:

“Ajo që është kriminale në raport me publikun, kur ka zhurma të mëdha të kësaj natyre duhet të presësh të bjerë fryrja e madhe e një plage për të adresuar shkaqet se ndryshe s’të dëgjon njeri, një plagë e kësaj natyre ku mjafton të vish ta shohësh dhe kupton menjëherë se ku je dhe s’ka dorë njeriu që ta ketë shkaktuar, kthehet në burim helmimi të vazhdueshëm të opinionit publik. Këtu jemi në një nga kantieret më strategjike të vendit, një nga veprat më të rëndësishme të programit tonë, mbrojtja lumore është absolutisht e standardeve më të larta, por puna vazhdon dhe ndodhin të papritura. Në këtë rast është thjesht dhe vetëm natyrore, fatkeqësi që ndodh për shkak të ngarkesës. Ndjesë njerëzve që u mbytën me baltë e llum nga të gjitha drejtimet”, tha Rama.

Segmenti provizor prej 200-300 metrash dhe i paasfaltuar ndodhet në vendin e quajtur Arrat e Rrugës.

Ai kalon përmes rrugës së vjetër të shembur e trasesë ku po punohej për Korridorin VIII dhe funksionon me sinjalistikë kantieri.

ARRSH ka thënë se rruga do të shtrohet kur të arrihet stabiliteti i shtresave të tokës. Qarkullimi në këtë devijim provizor do të kryhet derisa të ndërtohet rruga alternative 1.3 km. Kjo e fundit kërkon minimalisht 2 muaj kohë.

Lëvizja, edhe pse e vështirë në këtë segment provizor, ofrohet si zgjidhje edhe për kamionët e transportit ndërkufitar që hyjnë dhe dalin nga dy pikat e kalimit kufitar, të Qafë-Thanës dhe Kapshticës. Pas situatës së krijuar me rrëshqitjet në aksin Librazhd-Prrenjas pritet të rishikohet dhe projekti i Korridorit VIII, nëse do të vijojë të ndërtohet në gjurmën ku kishte nisur puna apo do të ndryshojë.