Që nga nisja e programit, më shumë se 170 mijë fëmijë në të gjithë vendin kanë përfituar bonusin e bebes.
Nëpërmjet një postimi të bërë në Facebook, kryeministri Edi Rama ka konfirmuar shifrat e përfituesve të kësaj mbështetjeje financiare.
“Mirëmëngjesi dhe me lajmin e mirë se më shumë se 170 mijë fëmijë kanë përfituar bonusin e bebes prej fillimit të programit të qeverisë në janar 2019, duke mbështetur familjet e reja me 40,000 lekë për fëmijën e parë, 80,000 për fëmijën e dytë dhe 120,000 lekë për fëmijën e tretë, ju uroj një ditë të mbarë”, shkruan Rama.
Bonusi i bebes është një ndihmë që jepet nga janari i viti 2019 për të gjitha familjet që bëhen me fëmijë, pavarësisht statusit social-ekonomik. Bonusi përfitohet menjëherë nëse prindërit e regjistrojnë të porsalindurin në zyrën e posaçme të hapura në çdo maternitet në vend dhe përfitohet në dy pjesë nëse prindërit zgjedhin ta regjistrojnë fëmijën e tyre më vonë.
Ndërkohë që për fëmijët që lindin në spitale private, apo jashtë vendit, çeku i bebes lëshohet nga Ministria e Shëndetësisë pas regjistrimit të të porsalindurit në zyrat e gjendjes civile. Prindërve u jepet një çek 40,000 lek për fëmijën e parë, 80,000 lek për fëmijën e dytë dhe 120,000 lek për fëmijën e tretë e më tej.
p.k\dita
