Nis sot ndarja e bonusit të fundvitit për të gjithë pensionistët në vend. Këshilli i Ministrave ka miratuar gjatë ditës së djeshme vendimin në të cilin konfirmon ndarjen e shpërblimit të fundvitit për të gjithë përfituesit e skemës së pensioneve. Sipas vendimit të marrë nga Këshilli i Ministrave, pensionistët edhe këtë fundvit bashkë me pensionin mujor do të marrin edhe shpërblimin në masën prej 5,000 lekësh. Ndërkohë që shpërblimi do të jetë më i lartë për përfituesit e pensionit të invaliditetit. Pas mbledhjes së qeverisë të zhvilluar ditën e djeshme, kryeministri Edi Rama bëri me dije se bonusi për përfituesit e pensioneve të invaliditetit do të jetë në masën e 11 mijë lekëve. Shpërblimi do të akordohet edhe për të gjitha familjet që aktualisht janë pjesë e skemës së ndihmës ekonomike, ku pjesë e skemës janë përkatësisht 64 mijë përfitues të kësaj pagese.
Sikundër ka ndodhur edhe përgjatë viteve të shkuara, ndarja e shpërblimit do të bëhet në pikat e postës, apo qendrat e pagesave ku merret pensioni çdo muaj. Për të shmangur radhët, Instituti i Sigurimeve Shoqërore ka përcaktuar edhe grafikun me datat se kur çdo pensionist do të duhet të paraqitet për të marrë shpërblimin që i takon.
“Kemi marrë një vendim, të cilin ua kemi premtuar pensionistëve dhe falë këtij vendimi, duke filluar nga dita e sotme do të fillojë lëvrimi i bonusit të fundvitit për të gjithë 695101 pensionistë, prej 5 mijë lekësh të reja. Për ata që kanë pension invaliditeti do të akordojmë edhe plus 6 mijë lekë të reja që shkojnë në 11 mijë lekë për këta pensionistë si kompensim i nevojshëm dhe i merituar. Do mbështesim edhe 64 mijë familje me ndihmë ekonomike”, ka deklaruar kryeministri Rama pas mbarimit të mbledhjes.
Shpërblimin për festat e fundvitit do ta përfitojnë të gjithë personat që marrin pension pleqërie, pension invaliditeti, pension familjar dhe pension social, sipas Ligjit nr. 7703, datë 11.5.1993 “Për sigurimet shoqërore në Republikën e Shqipërisë”, të ndryshuar dhe Ligjit nr. 4171, datë 13.9.1966 “Për sigurimet shoqërore në Republikën Popullore të Shqipërisë”. Një tjetër kategori përfituese janë edhe personat që marrin pension, sipas paragrafit të katërt, të nenit 96, të Ligjit nr. 7703, datë 11.5.1993 “Për sigurimet shoqërore në Republikën e Shqipërisë”, të ndryshuar dhe sipas Ligjit nr. 4976, datë 29.6.1972 “Për pensionet e anëtarëve të kooperativave bujqësore në Republikën Popullore të Shqipërisë”. Po ashtu, përfitojnë edhe personat që marrin pension sipas Ligjit 150/2014 “Për pensionet e punonjësve që kanë punuar në miniera në nëntokë”, personat që marrin trajtim të veçantë financiar, sipas Ligjit nr. 8685, datë 09.11.2000 “Për një trajtim të veçantë të punonjësve, që kanë punuar në miniera, në nëntokë”, të ndryshuar, dhe personat, që përfitojnë trajtim të veçantë financiar, sipas Ligjit nr. 9179, datë 29.01.2004 “Për një trajtim të veçantë të punonjësve, që kanë punuar në disa ndërmarrje të industrisë ushtarake”, të ndryshuar.
Shpërblimi sigurohet edhe nga personat që marrin pension të parakohshëm për vjetërsi shërbimi, sipas Ligjit nr. 10142, datë 15.05.2009 “Për sigurimin shoqëror suplementar të ushtarakëve të Forcave të Armatosura, të punonjësve të Policisë së Shtetit, të Gardës së Republikës, të Shërbimit Informativ të Shtetit, të Policisë së Burgjeve, të Policisë së Mbrojtjes nga Zjarri dhe të Shpëtimit e të punonjësve të Shërbimit të Kontrollit të Brendshëm në Republikën e Shqipërisë”, të ndryshuar;
Të drejtën e shpërblimit e kanë edhe të gjithë personat që nuk përfitojnë pension, por që trajtohen vetëm me shpërblimin financiar si veteranë të LANC-it, sipas Vendimit 190, datë 03.05.1995 të Këshillit të Ministrave “Për zbatimin e Ligjit nr. 7874, datë 17.11.1994 “Për statusin e veteranit të Luftës Antifashiste Nacionalçlirimtare të popullit shqiptar”, si dhe personat, të cilët marrin vetëm pension të posaçëm për merita të veçanta, sipas dispozitave të Ligjit nr. 4171, datë 13.9.1966 “Për sigurimet shoqërore në Republikën Popullore të Shqipërisë”;
Kategoria radhës përfituese janë edhe personat që marrin pension per shkak të profesionit te vështirë, sipas nenit 5 të Ligjit 29/2019 “Për trajtimin financiar, suplementar të punonjësve që kanë punuar në miniera në nëntokë, të punonjësve të industrisë së naftës e të gazit dhe të punonjësve që kanë punuar në metalurgji”.
Një tjetër vendim i kaluar më herët nga qeveria është edhe mbështetja që do të jepet për mbulimin e sigurimeve shoqërore dhe shëndetësore për nënat me shumë fëmijë që angazhohen në rritjen e tyre. Kështu duke nisur nga një janari i vitit 2023, është marrë vendim për nënat e papuna me tre fëmijë që qeveria do t’u paguaj të gjithë detyrimet shoqërore. “Kemi marrë vendimin për të filluar nga janari i vitit të ardhshëm edhe aplikimi për nënat e papuna e tre fëmijë të mitur që shoqëria do tu paguajë të gjitha sigurimet shoqërore dhe shëndetësore njësoj sikur të ishin në punë”, tha dje në përfundim të mbledhjes, kryeministri Edi Rama.
