“Ekzistojnë tri qendra të fshehta molotovi në Tiranë, Berisha kriminel që përdor fëmijë për të plagosur policë”

Ish-deputeti i Partisë Socialiste, njëherazi edhe ish-kryetari i Komisionit të Sigurisë Kombëtare, Spartak Braho tha në një intervistë për “Studio Live”, se në Tiranë me porosi të Sali Berisha janë sajuar tre qendra të fshehta për prodhim artizanal të bombave molotov.

Duke folur për protestën e pritshme të datës 20 Shkurt, Braho theksoi se “Protesta nuk ka sjellë asgjë nga ato që synon e çirret Sali Berisha, pasi ai më tepër e ka ngatërruar dhe e ka ngushtuar fokusin e objektivave që ka opozita. Ju mendoni se në 20 shkurt, kryengritja që thërret Saliu do sjellë ndryshim?

Asnjë ndryshim nuk do ketë, militantët do rrinë 2-3 orë atje, do hedhin fishekzjarre, molotovë kundër policëve duke rritur numrin e të plagosurve, të lënduarve, larg qoftë edhe ndonjë viktimë dhe pastaj do ikin si në rastet e tjera. Ky është skenari i kësaj proteste që bëhet vetëm për qëllimet personale të Sali Berishës.

Ata që do e pësojnë janë vetëm policët. Ky kriminel, nuk i bëhet gajle fare për shëndetin e trupës policore, kur ende në spital vazhdojnë të jenë të shtruar ende dy policë që mjekohen për djegjet e shkaktuara nga molotovi.

Atij nuk i bëhet vonë as nga angazhimi rrugaçëror i dhjetëra fëmijëve të gënjyer me pagesa, për të hedhur fishekzjarre dhe molotov.

Është konstatuar nga organet ligjzbatuese se në Tiranë ekzistojnë 3 qendra dhe mini-ofiçina ku prodhohen bombat molotov. Është plotësisht e saktë se këto pajisje janë armë luftarake të përdorura fillimisht si mjete luftarake në Luftën e Dytë Botërore. Me molotovë, ushtria sovjetike nxori jashtë loje tanket e gjermanëve në betejat për pushtimin e Kurskut dhe Stalingradit.

Pra, po prodhohen mjete luftarake nën dirigjimin dhe drejtimin e Sali Berishës dhe bandës së tij. Kjo është kryengritja thotë “paqësore”… Por në historinë e kryengritjeve dhe qëllimeve të tyre, kryengritjet s’kanë qenë asnjëherë paqësore. Nuk ka kryengritje paqësore. Kryengritjet realizohen me dhunë, gjak e të vrarë.

Kjo është biografia politike e Sali Berishës. Të vrasë, të krijojë destabilizim në Shqipëri. Policia dhe organet e tjera ligjzbatuese kanë kohë të identifikojnë qendrat prodhuese dhe personat që merren me prodhimin e këtyre mjeteve luftarake. Prodhimi dhe përdorimi i granatave molotov është vepër penale, krim, ndaj ata që përdorin dhe urdhërojnë përdorimin e tyre duhet të ndiqen, goditen dhe përgjigjen penalisht” – theksoi ai.

Braho shtoi se pafuqia e të majtës, organeve të drejtësisë dhe strukturave shtetërore, ka bërë që Berisha të jetë pjella e këtyre kryengritjeve ogurzeza, sepse disa herë ka provuar të djegë vendin si në 1997, në grushtin e shtetit në vitin 1998 etj.

“Është pafuqia e mazhorancës”, që e ka lejuar Berishën pas 1997 të vazhdojë normalisht rrugën e zjarrvënësit, sikur nuk ishte ky që dogji Shqipërinë, që tentoi grushtin e shtetit në vitin 1998, që shkaktoi 4 viktima dhe dhjetëra të plagosur në 21 Janar 2011.

Është paaftësia e organeve të drejtësisë, që e kanë lënë të livadhisë në këtë mënyrë. Ai ka qëndruar 4 vjet pa imunitet, në rastin e grushtit të shtetit në vitin 1998. Nga 1998-2001 ai, ndonëse ishte subjekt i denoncuar për krimet e mësipërme, por asnjëherë nuk u thirr nga organet e drejtësisë të jepte llogari.

Është iluzion të besosh tek ky i çmendur, i sëmurë psiqik, vrasësi gjakftohtë, që mendon vetëm për të veshur popullin e tij me të zeza, për të marrë pushtetin me dhunë e qëllimin e ruajtjes së interesave të familjes së tij. Por shumë shpejt, atij do t’i tregohet vendi. Ka kohë që ai po vëzhgohet edhe nga faktorë të tjerë ndërkombëtarë.

Ai është shpallur familjarisht person non grata, i rrezikshëm, jo vetëm për Shtetet e Bashkuara të Amerikës dhe Mbretëria e Bashkuar, por edhe për opinionin e gjerë të vendit. Ai sot nominohet si person dhe politikani kryesor që sjell ngatërresa dhe pengon zhvillimet demokratike në Shqipëri”.

E keqja ka hyrë thellë në zhvillimet e këtij vendi – theksoi Braho, dhe nuk po i del, por jo se nuk do dalë një ditë. Brenda një kohe shumë të shkurtër do kemi ndryshime të mëdha në forcat politike kryesore dhe drejtuesit e tyre. Si majtas dhe djathtas. Vetëm atëherë do ndryshojë fati i këtij vendi”. Unë vazhdoj të besoj tek NDRYSHIMI dhe mostra politike, Sali Berisha do t’i hiqet qafe këtij vendi dhe këtij populli.

Lidhur me ndryshimet që PS propozon në Kodin e Procedurës Penale, për pezullimin e drejtuesve të lartë shtetërorë kur ata akuzohen për shkelje të ligjit, korrupsion janë të pabazuara dhe të justifikuara. Ato bëhen vetëm gjoja për të “shpëtuar” disa drejtues të veçantë ministrorë të ngatërruar në korrupsion e shpërdorime siç është rasti i ministres Belinda Balluku.

Braho deklaroi se argumentet e mazhorancës janë fëminorë dhe se këto ndryshime të Kodit nuk e pengojnë dhe ndalojnë SPAK-un të vijojë hetimet ndaj kujtdo qoftë.

“Kam përshtypjen se ky ndryshim i propozuar është edhe selektiv, edhe kur shkelet zbatohet për të tërë njësoj. Formulimi i ndryshimit nuk arrin të pengojë hetimin e organeve, prokurorisë dhe gjykatës. Sipas ndryshimit të propozuar nga mazhoranca, mirë Ministri, zëvendësat, Kryeministri etj nuk kanë të drejtë të pezullohen në detyrë, po kategoria tjetër e drejtuesve të lartë a kanë të drejtë të hetohen duke u pezulluar kur shkelin ligjin?

Atëherë çfarë do fitohet me këtë ndryshim? Zonja Balluku siç tha Kryeministri paska dhënë 3 herë dorëheqjen. Por në këtë rast ka mungesë transparence. Nëse e ka dhënë 3 herë dorëheqjen dhe Kryeministri nuk ia ka pranuar, duhet pyetur, përse ka dhënë dorëheqjen? Shkaqet dhe arsyet duhen bërë publike. Dosja, me çfarë dëgjohet dhe thuhet dhe akuzat ndaj saj janë bërë goxha të trasha.

A do të shkojë ndonjëherë në gjyq zonja Balluku? Padyshim që po. Ky ndryshim i Kodit të Procedurës Penale mund ta shtyjë kohën, por nuk e pengon SPAK dhe nuk e ndihmon Ballukun që të gjykohet nga organet gjyqësore. Ky ndryshim nuk e nderon mazhorancën sepse është vetëm një alkimi ligjore dhe artificë.

Hetimi për zonjën Balluku po vazhdon dhe nuk ka njeri që i bën derman e ta ndalë. Ndonëse Kryeministri kohë më parë kur janë penalizuar ministra të tjerë ka rrëshqitur, duke argumentuar se përgjegjësia e gjithsecilit para ligjit është personale dhe jo e tija apo e PS.

Tani ai ka ndërruar pjatë dhe ka hedhur mantelin e mbrojtësit dhe avokatit duke propozuar ndryshime që nuk e ndihmojnë as atë as të penalizuarit rrotull tij – tha juristi Braho.