Një ngjarje e rëndë ka ndodhur këtë të diel në Bulqizë. 55-vjeçari Izmir Dumani ka humbur jetën, pasi një automjet kamionçinë ka rrëshkitur dhe ka rënë në banesën e tij.
Ngjarja ndodhi në fshatin Shtushaj në Bulqizë, ku 39-vjeçari i identifikuar A.T., duke ngarkuar automjetin e tij tip kamionçinë me gurë, nuk e ka siguruar mirë në frena dore, e si pasojë automjeti ka rrëshkitur duke rënë në banesën e Izmir Dumanit.
Ky i fundit në momentin e rënies së automjetit ndodhej në oborrin e banesës dhe për pasojë ka humbur jetën menjëherë. Drejtuesi i automjetit është shoqëruar në Komisariatin e Policisë Bulqizë për veprime të mëtejshme hetimore dhe po merret në pyetje. Grupi hetimor ndodhet në vendngjarje dhe po punon për zbardhjen e plotë të rrethanave të këtij aksidenti.
