Trajtimi i urgjencave kardiake të rretheve, krahas QSUT, tashmë kanë nisur të bëhen edhe në Shërbimin e Hemodinamikës tek ish-Sanatoriumi.
Çdo ditë të hënë, në këtë shërbim përgjatë gjithë ditës realizohen ndërhyrjet për urgjencat kardiake që vijnë kryesisht nga Elbasani, Durrësi, Korça, si dhe disa rrethina të Tiranës.
Dhënia e këtij shërbimi edhe tek ish-Sanatoriumi, sipas autoriteteve të shëndetit shkurton shumë kohën për realizimin e ndërhyrjes që tek këta pacientë është kritike.
Orientimin se cilat janë ndërhyrjet që do të zhvillohen në QSUT, apo në Sanatorium do ta bëjë Urgjenca Kombëtare. Sipas bluzave të bardha, çdo gjë do të bëhet nëpërmjet Urgjencës Kombëtare. Do të jetë urgjenca ajo që do të bëjë ndarjen e pacientëve dhe mënyrën e planifikimit se si ata do të lëvizin drejt strukturave ku do të zhvillojnë ndërhyrjen.
Sipas planit të përcaktuar nga Ministria e Shëndetësisë, shërbimi për trajtimin e urgjencave kardiake tek Spitali Universitar “Shefqet Ndroqi” (ish-Sanatoriumi), do të kryhet çdo të hënë 24 orë, ndërsa gjatë ditëve të tjera të javës do të jetë në funksion nga 07.00 deri në orën 15.00. Pranë këtij spitali bëhet me dije se kryhen edhe rreth 10 ndërhyrje kirurgjikale të ndryshme në ditë.
p.k\dita
