Nënkomiteti i CEFTA-s për Tregtinë e Shërbimeve, i kryesuar nga Ministria e Ekonomisë e Republikës së Moldavisë, u mbajt në Bruksel më 23-24 qershor. Pjesëmarrësit diskutuan për bashkëpunimin në sektorë të ndryshëm të shërbimeve, ku është bërë një përparim i dukshëm në fushën e tregtisë elektronike, veçanërisht në heqjen e gjeobllokimeve të pajustifikuara dhe lehtësimin e dërgesës së pakove në CEFTA.
Ekspertët e palëve të CEFTA-s, ranë dakord se COVID-19 solli mundësi të reja për tregtinë dhe kjo është arsyeja pse lehtësimi i tregtisë elektronike është një nga prioritetet kryesore të CEFTA-s. Nga komiteti i përbashkët i CEFTA-s është përgatitur paketa e tre vendimeve që duhet të lehtësojnë tregtinë online dhe të forcojnë besimin e konsumatorëve. Të gjitha aktivitetet e CEFTA-s bazohen në legjislacionin dhe praktikat më të mira të BE-së, që do të mbështesin palët e CEFTA-s kur të anëtarësohen në BE.
Nënkomiteti i Tregtisë së Shërbimeve diskutoi edhe për nisma të tjera në fushën e turizmit, kualifikimeve profesionale, shërbimeve financiare, lejeve të punës dhe statistikave. Një nga objektivat është lehtësimi i lëvizjes së njerëzve që udhëtojnë për të ofruar shërbime, duke hequr burokracitë e tepërta, që lidhen kryesisht me lejet dhe licencat e punës.
“Kemi përfunduar anën teknike e cila është pjesa më sfiduese. Jemi shumë afër që këto dokumente të jenë gati për miratim. Besoj se ky është një lajm i mirë për bizneset që shpresojnë të zgjerojnë bazën e tyre të konsumatorëve në tregje të tjera të CEFTA-s.” komentoi Emir Djikic, drejtor i Sekretariatit të CEFTA-s.
Në fund, Nënkomiteti për Tregtinë e Shërbimeve miratoi Bazën e përmirësuar të të Dhënave Rregullatore të Shërbimeve të CEFTA-s, dhe njoftoi se ajo do të hyjë në veprim së shpejti. Baza e të Dhënave Rregullatore do të sigurojë që rregullat e brendshme të jenë transparente, jodiskriminuese, proporcionale dhe të justifikuara nga objektivat e interesit publik, me qëllim parandalimin e barrierave për tregtinë e shërbimeve brenda CEFTA-s.
Protokolli Shtesë i CEFTA-s 6 (AP6) mbi Tregtinë e Shërbimeve, u miratua në vitin 2019 dhe hyri në fuqi më 11 janar 2021. Ky dokument e zgjeroi parimin e tregtisë së lirë brenda CEFTA-s në sektorin e shërbimeve. AP6 ofron një kornizë për nxitjen e rritjes së tregtisë së shërbimeve, përveç kufizimeve të hequra më parë në tregtinë e produkteve industriale dhe bujqësore. Protokolli fokusohet veçanërisht në angazhimet për aksesin në treg dhe ato që lidhen me diskriminimin e kompanive në treg. Moldavia kryeson Nënkomitetin e CEFTA-s për Tregtinë e Shërbimeve në vitin 2022.