Kreu i KQZ-së, Ilirjan Celibashi tha në një komunikim me mediat se fletët po printohen nga një kompani sllovene dhe se do të jenë gati deri më 7 prill ndërsa brenda datës 8 prill pritet të vijnë në Shqipëri. Celibashi tha se përgatitja e zarfeve me fletën e votimit do të bëhet brenda datave 8-10 prill, ndërsa zgjedhësve jashtë parashikohet që t’u dërgohet brenda datës 17 prill.
Gjithashtu ai tha se çdo zgjedhës mund ta marrë vetëm personalisht zarfin zgjedhor me mjet identifikimi, që do t’u dërgohet nga operatori i shërbimit postar, dhe se posta do shkojë 3 herë në orare të ndryshme. Kreu i KQZ-së tha se zgjedhësit do të kenë 3-4 ditë kohë për ta plotësuar fletën e votimit dhe të nisin zarfin.
“Ka filluar procesi i printimit të fletëve të votimit për votimin jashtë vendit dhe besojmë që midis datave 7-8 Prill do të kemi këtu fletët e votimit. Midis 8-9-10 fillojmë përgatitjen e zarfave dhe dokumentacionin që do t’u dërgohet votuesve, duke shpresuar që ky process të realizohet brenda datës 15-17 Prill. Kohë e mjaftueshme sipas parashikimeve kontraktuale që do të kemi me operatorin e shërbimit postar për të dërguar zarfat, për t’i dhënë kohë rreth 3-4 ditë për të plotësuar fletën e votimit dhe koha për t’u kthyer në KQZ deri në 19:00 të datës 11 Maj.
Jemi duke përfunduar një tutorial për gjithë sa duhet të bëjë votuesi nga jashtë dhe me brenda 2-3 ditëve do të bëhet publike nëpërmjet mediave por edhe rrjeteve sociale. Po ndërtojmë një system të ndihmës dhe këshillimit për votuesit nga jashtë nëse kanë nevojë për sqarime për procedurat e votimit. Në setin e dokumentacionit, që do t’u dërgojmë do të jetrë edhe një udhëzues që sqaron qartësisht se çfarë duhet të bëjë votuesi nga jashtë”, tha Celibashi.
j.l./ dita
