Duke i detyruar klientët e tyre që të merrnin kredi të reja për të shlyer të vjetrën, ushtruar presion ndaj të afërmve të klientëve për të paguar kredi që ata i kishin shlyer me kohë apo duke i kërcënuar me sekuestrim prone, dy subjekte financiare jobanka, konkretisht Micro Credit Albania dhe Final me mbi 15 mijë dhe 16 mijë klientë, zhvatën qytetarët.
Vetëm një javë më parë, Banka e Shqipërisë njoftoi revokimin e licencave për këto shoqëri. Por çfarë do të ndodhë me kredimarrësit e këtyre dy kompanive?
Vlerësohet se 90% e klientëve të Micro Credit Albania kanë marrë vendim gjykate, ose janë në proces përmbaruesish. Vlera e kredive të këqija në këtë shoqëri është 9.6 mld lekë dhe është rifituar 10% e saj. Ndërsa, për kompaninë Final, nuk është bërë e ditur vlera monetare, por mësohet se 90% të klientëve i ka në përmbarim.
Portofoli i klientëve të këtyre kompanive është tashmë nën kontrollin e Bankës së Shqipërisë. Atyre u është dhënë një adresë email-i dhe numër kontakti, ku mund të shprehin ankesat dhe kërkesat e tyre për sqarim ose mund t’i drejtohen menjëherë zyrës përkatëse brenda Bankës së Shqipërisë ose punonjësve të kësaj të fundit në adresën fizike të institucioneve MCA dhe FINAL. Në Bankën e Shqipërisë është ngritur një grup pune për trajtimin e kujdesshëm të këtyre rasteve dhe është njoftuar Agjencia Shtetërore e Kadastrës mbi vendimin e revokimit të licencave, me qëllim që të mos ndërmarrë veprime lidhur me tjetërsimin e pronave të klientëve.
Përveç kredive me probleme, këto subjekte kanë një numër të madh kredish performuese, ndaj aktualisht po bisedohet me bankat e nivelit të dytë që këto kredi të rikthehen në sistemin bankar. Ndërsa për zgjidhjen e rasteve të tjera problematike do të nevojitet më tepër kohë, pasi në këtë proces do të përfshihet edhe likuidatori. Banka Qendrore po verifikon bazën e të dhënave nga serverat e kompanive, për të parë të gjithë numrin e klientëve. Ndjekja e këtyre klientëve nuk do të ketë më një qasje përfituese, por një qasje ndihmuese ndaj konsumatorit.
j.l./ dita
