Avokati Arbër Hoxha ka sqaruar se edhe pse Shqipëria nuk ka marrëveshje ekstradimi me Marokun, kjo nuk është pengesë për të ekstraduar Ruven Saraivën në vendin tonë. Megjithatë, duke njohur precedentët e kaluar dhe burokracitë e drejtësive të çdo vendi, për më tepër kur i kërkuari rezulton me origjinë marokene, duket se beteja juridike do jetë e gjatë dhe e vështirë. Por në dokumente Saraiva rezulton shtetas portugez, gjë që lehtëson ndjeshëm procedurat. Gjithashtu avokati tregoi se portugezi ka dy kërkesa për ekstradim, nga Britania e Madhe që e kërkon për trafik droge dhe në Shqipëri për vrasje. Në këto kushte, ai shpjegon se kërkesa e Shqipërisë prevalon pasi kemi të bëjmë me një vepër penale më të rëndë.
“Nuk kemi një marrëveshje ekstradimi. Edhe pse nuk kemi, nuk përbën asnjë pengesë ligjore, për ta ekstraduar këtë shtetas sepse është portugez. Ajo që do ishte shkak negative, do ishte nëse ky shtetas i përket Marokut. Duke qenë se është portugez, nuk ka asnjë pengesë për t’u ekstraduar. Ai është shpallur në kërkim për vrasje, në këto kushte Maroku është i detyruar që nëse Drejtoria e Marrëdhënieve me Jashtë nëpërmjet Ministrisë së Drejtësisë, do i çoje të gjitha provat, Maroku mbi bazën e marrëveshjes me Interpol, është i detyruar, nëse Gjykata e vendos gjithmonë. Nëse do ishte Maroken, nuk do ekstradohej, çdo shtetas tjetër, i ndryshëm nga shtetas të atij vendi, mund të bëhet ekstradimi. Këto parimet e reciprocitetit janë vetëm për pengjet e luftës. Do jetë Gjykata e Rabat se ku do të ekstradohet fillimisht, por Britania e Madhe ka një avantazh se vendimi penal atje ka marrë një vendim të formës së prerë ndërkohë që këtu është një masë arresti. Por Shqipëria ka avantazh se këtu po kërkohet për vrasje”, tha avokati Arbër Hoxha për “Report Tv”.
