Presidenti rus Vladimir Putin i dha sot shtetësinë ruse ish-oficerit të inteligjencës amerikane Edward Snowden, sipas dokumentit përkatës të publikuar në portalin e informacionit ligjor të Rusisë. “Në përputhje me paragrafin “a” të nenit 89 të Kushtetutës së Federatës Ruse, vendos: të pranoj shtetësinë e Federatës Ruse të personave të mëposhtëm: Edward Joseph Snowden, i lindur më 21 qershor 1983 në Shtetet e Bashkuara të Amerikës”, thuhet në dekret, me firmën e presidentit rus.
39-vjeçari Snowden është një teknik amerikan (administrator i sistemeve) i cili ka punuar, me kontratë, për NSA (Agjencia e Sigurisë Kombëtare e SHBA) dhe CIA. Në vitin 2013, Snowden zbuloi në shtyp informacione të klasifikuara nga NSA në lidhje me programet e mbikëqyrjes masive të zbatuara nga qeveritë amerikane dhe britanike. Informacioni zbulon programet e mbikëqyrjes të drejtuara nga NSA me bashkëpunimin e kompanive të telekomunikacionit dhe qeverive evropiane.
Snowden mori një leje të përhershme qëndrimi në Rusi, siç tha avokati i tij, Anatoli Kucherena, më 22.10.2020. Që atëherë, në fakt, ai kishte aplikuar për nënshtetësinë ruse.
Në SHBA, Snowden akuzohet për shkelje të dy neneve të legjislacionit të spiunazhit. Shkelja e çdo neni dënohet me burgim deri në dhjetë vjet. Autoritetet amerikane kanë deklaruar vazhdimisht se e konsiderojnë Snowdenin tradhtar dhe nuk synojnë ta falin, pasi ai ka dëmtuar interesat e sigurisë kombëtare të SHBA-së.
a.m/dita
Snowden eshte limon i shtrydhur ,pa interes per ameriken.Qe nga ajo kohe sistemet kane ndryshuar .leverdia e Putinit eshte qe e vlereson trurin e tij.