Leo Messi vendosi të lërë Europën dhe karrierën e madhe në Barcelonë e Paris duke kaluar në anën tjetër të Atlantikut dhe do të luajë në MLS për fanellën e Inter Miami.
Ndikimi i transferimit të argjentinasit në klubin e David Beckham u pa pothuajse menjëherë, pasi brenda disa orësh nga njoftimi, llogaritë e klubit në mediat sociale kanë marrë superxhiro. Në mënyrë të veçantë, në Instagram ndjekësit kanë kaluar 4.5 milionë, nga 900 mijë që ishin para këtij transferimi.
Por, çmenduria për superyllin argjentinas dhe kampionin e botës nuk ka fund. Siç u bë e ditur, të gjitha ndeshjet e Inter Miami deri në përfundim të sezonit janë shitur, ndërkohë që çmimet e bileteve janë rritur shumë, deri në trefish.
Më fakt, vështirësia për dikë për të parë një ndeshje ku do të marrë pjesë Lionel Messi është e madhe, edhe nëse është Sergio Aguero. Sulmuesi argjentinas foli në një emison televiziv dhe pohoi se as ai vetë nuk ka mundur të sigurojë praninë e tij në tribunë.
“I kërkova Messit një biletë për një ndeshje të Inter Miami dhe ai më tha që ishin shitur të gjitha. Nuk ka bileta. Nuk e di se çfarë po ndodh”, ishin fjalët e Agueros.
Një tjetër detaj interesant është fakti se Messi do të ketë një pjesë të aksioneve të klubit nga tani, pra edhe pasi ta lërë futbollin.
Gjithashtu për çdo biletë të shitut, fanelë, sponsorizim, marketing, transmetim televiziv, këpucë apo aksesorë, gëzon të drejtën e përqindjes së caktuar. E thënë ndryshe, nëse Inter Miami do të xhirojë 1 mld USD në total deri në fund të sezonit, messi do përfitojë përqindjen e tij si aksioner, që shkon sipas raportimeve deri në 20%, aq sa ka edhe Beckham. Dhe kjo, pa llogaritur rrogën që ka vendosur klubi, midis 40-60 mln në sezon dhe bonuseve të tjera.
Mediat konfirmojnë se Messi firmosi me amerikanët një kontratë të “Modelit Jordan”: Përqindje për çdo cent të hyrë në arkën e klubit dhe më tej markë personale për artikujt sportivë, si dhe sipërmarrje biznesi…
