Tetë persona kanë humbur jetën ditën e djeshme gjatë një bastisjeje nga forcat e zbatimit të ligjit në Rio de Zhaneiro, duke përfshirë një nga udhëheqësit e bandave të trafikut të drogës i cili ishte ndër kriminelët më të kërkuar në Brazili, sipas autoriteteve.
Rreth 150 forca policie u vendosën që nga agimi në lagjen turistike të Santa Terezës, afër qendrës së qytetit të madh.
Claudio Augusto dos Santos, 55 vjeç, kundër të cilit ishin në pritje tetë urdhër-arreste, veçanërisht për trafik droge dhe vrasje, u vra gjatë operacionit, tha kreu i xhandarmërisë në Rio, Marcelo Menezes Nogueira, gjatë një konference shtypi.
Mediat shkruajnë se autoritetet e konsideronin atë një figurë të rëndësishme në bandën Comando Vermelho, një nga organizatat kriminale më të fuqishme në Brazil. Policia vrau gjithashtu gjashtë kriminelë të tjerë dhe arrestoi 116 të dyshuar gjatë operacionit, sipas një deklarate.
Vdekja e tetë e konfirmuar nga autoritetet ishte ajo e një banori të lagjes i cili ishte marrë peng në shtëpinë e tij me gruan e tij nga persona të armatosur që përpiqeshin të arratiseshin nga policia. Gjatë negociatave autorët e rrëmbimit kanë hapur zjarr dhe burri është goditur nga një plumb në kokë. Forcat e rendit thanë gjithashtu se kishin sekuestruar 21 armë, 105 kilogramë kanabis dhe më shumë se 600 kilogramë marijuanë.
Hakmarrja për bastisjen e Policisë
Si hakmarrje për këtë bastisje, një autobus u dogj në një rrugë kryesore në Rio. Autobusë të tjerë u vendosën në rrugë specifike të kthyera në barrikada të improvizuara, duke shkaktuar kaos në këtë zonë me trafik të rëndë. Policia ia atribuoi këto veprime CV-së.
Në fund të vitit 2025, kjo bandë u bë shënjestra e operacionit më vdekjeprurës policor në historinë braziliane, ku më shumë se 120 njerëz vdiqën në dy lagje të mëdha të përbëra nga favelat në Rio.
Të mërkurën, policia kreu një operacion në shkallë të gjerë kundër krimit të organizuar në 15 shtete braziliane, duke synuar trafikun e armëve dhe drogës dhe pastrimin e parave.
Administrata e Donald Trump ka etiketuar disa kartele droge të Amerikës Latine organizata terroriste dhe ka nisur dhjetëra sulme ajrore kundër anijeve të shpejta që thotë se ishin të përfshira në trafikun e drogës në Karaibe dhe Paqësor, duke vrarë të paktën 150 njerëz.
j.l./ dita
