Në shitje, tre apartamentet luksoze: Historia e kryeministrit të dënuar për korrupsion, nga përgjimet, te protesta dhe arratisja

Tre apartamente luksoze të ish-kryeministrit Nikolla Gruevski të sekuestruara pas dënimit të tij për korrupsion janë nxjerrë në shitje në Shkup. Ato do të jenë të hapura për shikim më 16 korrik, ndërsa ankandi publik është caktuar për më 29 korrik.

Dy nga apartamentet kanë sipërfaqe banimi prej rreth 200 metrash katrorë secili, si dhe tarraca me sipërfaqe pak më pak se 50 metra katrorë. Çmimi fillestar për secilin prej tyre është 850.000 euro. Apartamenti i tretë ka një sipërfaqe prej rreth 150 metrash katrorë dhe një ballkon prej 95 metrash katrorë. Ai ofrohet me çmim fillestar prej 760.000 euro.

Vlera e përgjithshme fillestare e tri pronave arrin në 2,46 milionë euro, ndërsa çmimi mesatar për metër katror tejkalon 3.400 euro.Shuma përfundimtare mund të rritet më tej gjatë ankandit publik.

Apartamentet posedojnë ambiente të gjera, tarraca të mëdha, pajisje luksoze, xhakuzi dhe një pamje panoramike mbi Shkupin.

Dy nga apartamentet ishin nxjerrë edhe më herët në shitje, por përpjekjet për t’i shitur përfunduan pa blerës.

Pronat u konfiskuan pas procedurës gjyqësore për rastin “Parcelat në Vodno”, në të cilin ish-kryeministri Nikolla Gruevski u dënua me nëntë vjet burg.

Rasti kishte të bënte me përvetësimin e paligjshëm nga kryeministri të 1,3 milionë eurove dhe përdorimin e tyre për blerjen e tokës dhe ndërtimin e këtyre pasurive të paluajtshme.

Nikola Gruevski shërbeu si Kryeministër i Maqedonisë së Veriut nga viti 2006 deri në vitin 2016 dhe udhëhoqi për shumë vite partinë VMRO-DPMNE. Gruevski nisi qeverisjen me një profil kryesisht teknokrat dhe pro-evropian (pasi kishte shërbyer më herët si Ministër i Financave). Megjithatë, me kalimin e viteve, qeverisja e tij u zhvendos drejt politikave të forta nacionaliste.

Mandati i tij u lëkund rëndë në vitet 2015–2016 pas një skandali masiv të disa përgjimeve për korrupsion që u bënë publike.

Publikimi i përgjimeve çoi në protesta të gjera popullore (të quajtura “Revolucioni Laraman”) që çuan në dorëheqjen e tij. Pas largimit nga pushteti, ndaj Gruevskit u ngritën akuza nga Prokuroria Speciale për korrupsion, shpërdorim detyre dhe nxitje të dhunës. Në shtator t2018, ai u dënua fillimisht me dy vite burgim për rastin “Tanku” (blerja e paligjshme e një makine luksoze Mercedes të blinduar me paratë e shtetit). Më vonë ndaj tij u dhanë edhe 5 dënime të tjera, një total prej rreth 25.5 deri në 26 vjet burgim në mungesë.

Në nëntor 2018, Gruevski u arratis në mënyrë spektakolare nga Maqedonia e Veriut. Ai udhëtoi fshehurazi përmes Shqipërisë, Malit të Zi dhe Serbisë, duke mbërritur në Budapest, ku qeveria e Viktor Orbán-it i dha azil politik.

Çështja e Gruevskit është rikthyer së fundmi në qendër të vëmendjes për shkak të ndryshimeve politike në Hungari. Fituesi i zgjedhjeve të fundit hungareze, Péter Magyar, ka deklaruar publikisht se Hungaria nuk do të jetë më strehë për të korruptuarit ndërkombëtarë dhe ka sinjalizuar mundësinë e ekstradimit të tij.

Nga ana tjetër, pasardhësi i tij në krye të VMRO-DPMNE-së dhe Kryeministri aktual i Maqedonisë së Veriut, Hristijan Mickoski, ka bërë të qartë se sapo Gruevski të shkelë në territorin e Maqedonisë së Veriut, duhet të arrestohet.

o.p. / dita