51 punonjës të Policisë së Shtetit janë lënduar gjatë akteve të dhunës të regjistruara gjatë protestës studentore në Tiranë. Lajmi është bërë i ditur nga ministri i Punëve të Brendshme, Ervin Demo, i cili ka reaguar përmes një mesazhi, duke dënuar dhunën ndaj efektivëve.
Sipas ministrit, disa prej punonjësve të policisë ndodhen aktualisht në Spitalin Ushtarak, ku po marrin kujdesin e nevojshëm mjekësor.
Në reagimin e tij, Demo thekson se pas çdo uniforme ndodhet një njeri, një prind apo familjar që ka dalë nga shtëpia për të përmbushur detyrën dhe për të garantuar sigurinë e qytetarëve.
Ai ka falënderuar efektivët e policisë për qëndrimin e tyre gjatë protestës, duke vlerësuar profesionalizmin, përkushtimin dhe përgjegjësinë e treguar përballë dhunës dhe rrezikut.
Reagimi i plotë:
51 punonjës të Policisë së Shtetit janë lënduar gjatë akteve të dhunës së sotme. Disa prej tyre ndodhen aktualisht në Spitalin Ushtarak, ku po marrin kujdesin e nevojshëm mjekësor.
Pas çdo uniforme është një njeri. Një prind, një bir, një bijë, një familjar që ka dalë nga shtëpia për të përmbushur detyrën dhe për të garantuar sigurinë e qytetarëve.
Dhuna ndaj punonjësve të Policisë së Shtetit është e papranueshme dhe nuk mund të justifikohet në asnjë rrethanë. E drejta për të protestuar është e garantuar, por dhuna ndaj atyre që kanë për detyrë të mbrojnë rendin dhe sigurinë nuk është dhe nuk mund të jetë kurrë pjesë e saj.
Mirënjohje dhe respekt për çdo punonjës policie që sot, përballë dhunës dhe rrezikut, qëndroi në krye të detyrës me profesionalizëm, përkushtim dhe përgjegjësi.
Ju uroj shërim sa më të shpejtë të gjithë efektivëve të lënduar! Jemi pranë jush dhe familjeve tuaja.
Pas uniformës është njeriu. Pas detyrës është sakrifica. Dhe kjo sakrificë meriton respektin e të gjithëve.
