Deputeti i bundestagut gjerman, Adis Ahmetoviç është shprehur se Bashkimi Evropian ka bërë gabime në rajonin e Ballkanit Perëndimor gjatë 20 viteve të fundit.
Në një deklaratë për mediat, Ahmetoviç theksoi se me fillimin e luftës në Ukrainë, tanimë ka dinamika të reja në procesin e integrimit europian dhe BE-ja ka kuptuar që ndoshta nuk ka bërë më të mirën për këtë rajon.
“Gjatë 20 viteve të fundit, Bashkimi Evropian ka bërë shumë gabime në rajonin e Ballkanit Perëndimor. Ka 10,20, 30 vjet që vendet e Ballkanit Perëndimor punojnë për të qenë partnerë të barabartë për Bashkimin Evropian, por nuk kanë qenë partner të barabartë. Lufta në Ukrainë, pushtimi rus hapi disa dyer të reja dhe kemi këtë dinamikë të re në procesin e integrimit europian, tashmë. Disa shtete të Bashkimit Evropian kanë kuptuar që ndoshta nuk kanë bërë më të mirën për rajonin e Ballkanit Perëndimor”, tha Ahmetoviç.
Putin synon edhe destabilizimin e Ballkanit Perëndimor, thotë Ahmetoviç.
“Pas një situate të re në botë, por edhe kështu edhe në Evropë, Putini dhe Rusia bënë diçka, destabilizuan Lindjen e Evropës. Putini po kështu ka edhe një plan tjetër, të destabilizojë Evropën Juglindore, pra Ballkanin Perëndimor”, sipas tij.
Madje, deputeti gjerman deklaron se Rusia mbështet protestat në Shkup dhe kërkon rrëzimin e qeverisë.
Po të shohim demonstratat në Maqedoninë e Veriut, këto mbështeten edhe nga Moska, pra ka mbështetje për opozitën. Putini ka shumë interes për të destabilizuar Maqedoninë e Veriut dhe ndoshta të çojë në ndryshim regjimi në Maqedoninë e Veriut, kështu që na duhet ta mbrojmë qeverinë në Maqedoninë e Veriut, ta mbështesim politikisht.
Deputeti gjerman vizitoi ditën e djeshme Tiranën, ku pati dhe një takim me kryetarin e Grupit parlamentar të Partisë Socialiste, Taulant Balla.
