Dëshmia telefonike në emisionin “Pa gjurmë” ka trazuar jetët e shumë familjeve që prej ditës së enjte; të atyre të dëmtuara që duan të dinë fatin e 2 shoqeve të zhdukura pa gjurmë prej vitit 2004 dhe që dyshohet se janë vrarë dhe groposur në dunat e plazhit të Divjakës prej kreut të një prej grupeve kriminale në Lushnjë dhe të familjeve të personave që u ka dalë emri si të përfshirë e të dyshuar në këtë krim monstruoz e të paprecedentë. Fati i Nertila Osmanit dhe Sonila Kryeziut, që u zhdukën në të njëjtën datë mbrëmjen e 11 marsit të 19 viteve më parë, mund të zbardhet vetëm nëse Prokuroria dhe Policia do të gërmojnë të gjithë zonën përreth kabinave të vjetra të plazhit ku dëshmitarja tha se një miku i saj që nuk jeton më, me pseudonimin “Sepentja”, ia kishte treguar dikur. Policia e Divjakës po pret lejen e Prokurorisë për të nisur gërmimet, teksa në Tiranë janë marrë provat paraprake, si kaseta e dëshmisë së personit që telefonoi dhe kishte dijeni se autori ishte i ndjeri Arben Hoxha, që në fakt vrau nënën e vajzës së tij dhe shoqen e saj që po e strehonte dhe ndihmonte në arratisje.
Ka dalë në dritë edhe personi i tretë që mendohet se ka ndihmuar në groposjen e trupave me urdhër të Hoxhës, sipas dëshmitares. Ai është Artan Begaj, i cili u arrestua me një sasi lënde narkotike më herët dhe besohet se ka qenë bashkë me ‘Sepenten’.
Arben Hoxha, i bandës së Lushnjës, mbante nofkën “Ben Komisari” dhe në atë kohë bashkëjetonte në zonën e Laprakës me Nertila Osmanin, me të cilin në vitin 203 solli në jetë dhe një vajzë. Ditën kur Nertila humbi, bashkëjetuesi i saj i tregoi se do nisej për në Gjermani dhe pas debatit mes tyre vajza u takua me shoqen e saj Sonila Kryeziu. Siç motra e saj dëshmoi, edhe Sonila ishte larguar nga banesa, pasi një djalë me emrin Dani nga Durrësi, e kishte telefonuar mbrëmjen e 11 marsit të vitit 2004. Dëshmitarja rrëfeu konfliktet që kishte pasur Osmani me Hoxhën dhe më tej shkaktimi i vrasjes së dyfishtë dhe mbulimi i gjurmëve. Personi që ia kishte treguar ngjarjen, sipas saj kishte qenë nën efektin e alkoolit. Rezulton se 2 nga tre autorët tashmë nuk jetojnë më dhe i treti ka rolin e bashkëpunëtorit në fshehje të kufomave, gjurmëve dhe moskallëzimit. Ai mund t’i ndihmojë hetuesit të zbardhin një krim nga më makabrit të ndodhur këto dekada në vend. Gjetja e trupave do të mbyllte një tjetër dosje pa autorë, pasi duket se drejtësi nuk mund të vendoset më. Hoxha u vra një vit pas kësaj ngjarjeje, në një tjetër konflikt.
Motra e Nertilës dëshmoi se janë tronditur së tepërmi nga kjo dëshmi dhe lajmi se ajo është vrarë e groposur që prej momentit të zhdukjes, edhe pse kishin dyshime. “Jemi të shkatërruar për këtë lajm, nëna ime është mbyllur në dhomë dhe vetëm qan. Duam të zbardhet plotësisht dhe të vihet drejtësi”, u shpreh ajo.
