Dështojnë negociatat SHBA-Iran, JD Vance: Nuk ka marrëveshje, ne i bëmë të qarta “vijat e kuqe”

Negociatat maratonë mes Shteteteve të Bashkuara të Amerikës dhe Iranit në Islamabad përfunduan pa një marrëveshje.

Zëvendëspresidenti amerikan, JD Vance, konfirmoi largimin e tij nga Pakistani pas dështimit të bisedimeve, duke theksuar se Uashingtoni kishte paraqitur një “ofertë përfundimtare dhe më të mirë”.

Sipas Vance, pengesa kryesore mbetet refuzimi i Teheranit për t’u angazhuar në mënyrë të qartë për heqjen dorë nga programi i armëve bërthamore.

Nga ana tjetër, Ministria e Jashtme iraniane deklaroi se disa pika u dakordësuan, por mosmarrëveshjet për “dy ose tre çështje kyçe” bllokuan arritjen e një marrëveshjeje, duke fajësuar kërkesat e SHBA-së si të paarsyeshme.

Në sfondin e negociatave, tensionet u shtuan edhe në Ngushticën e Hormuzit, një rrugë jetike për transportin global të naftës. Irani mohoi pretendimet për lëvizje të anijeve të tij dhe paralajmëroi se çdo prani ushtarake në zonë do të përballet me “përgjigje të fortë”.

Ndërkohë, Pakistani u ka bërë thirrje të dyja palëve të ruajnë armëpushimin dhe të vijojnë përpjekjet diplomatike. Megjithëse aktualisht nuk është planifikuar një raund i ri negociatash, zyrtarët iranianë theksojnë se dialogu mbetet i hapur, duke nënvizuar se “diplomacia nuk mbaron kurrë”.

Dështimi i këtyre bisedimeve i lajmëruar nga Vance nga Islamabadi në mes të natës, tronditi botën, duke lënë të pasigurt rrugën drejt një marrëveshjeje të mundshme në të ardhmen.

j.l./ dita