Një 16-vjeçar në Pejë të Kosovës është neutralizuar dhe arrestuar nga Policia pas një planifikimi që mund të shënonte një tragjedi të madhe.
Sipas raportimeve mësohet se adoleshenti kishte planifikuar vrasjen e shokëve dhe shoqeve të klasës së tij, pasi iu gjet një listë me emra.
Autoritetet kanë ndërhyrë në kohë dhe kanë parandaluar aktin, ndërsa policia vijion të hetojë çështjen.
Veprimi i tyre ka qenë i menjëhershëm, duke kryer bastisje në disa lokacione në qytetin e Pejës.
Zv.ministri i Brendshëm i Kosovës Taulant Kelmendi është shprehur:
“Jemi të indinjuar me lajmin se një 16-vjeçar në Pejë dyshohet për planifikimin e vrasjes së shokëve dhe shoqeve të klasës. Është e rëndësishme që autoritetet kanë reaguar në kohë për të parandaluar një tragjedi të madhe. Siguria në shkolla është thelbësore për të krijuar një mjedis të sigurtë shoqëror, për çka duhet të angazhohen të gjitha institucionet, familjet dhe shoqëria.”
Drejtori i shkollës thekson se arrestimi ka ndodhur gjatë së shtunës.
“Policia kanë ardhur në shkollë dhe i kanë marrë të dhënat e tij. Sipas një skeme që e ka të përgatitur ai. Do të thotë Policia ka gjurmë të skemës së tij që i kanë marrë nëpër rrjetet sociale. Dje e kanë arrestu, ne nesër do të takohemi si shkollë, me e pa gjendjen e tij, aspektin me klasë, me kujdestarin e klasës me e pa a ka mungesa, a ka pasur vijueshmëri të rregullt në shkollë”, shtoi ai.
Sipas njoftimit të Prokurorisë speciale, dyshohet se i mituri këtë plan po e hartonte prej disa muajsh.
“Në periudhë kohore disamujore ka bërë plane dhe është përgatitur për ndërmarrjen e një sulmi të gjerë ndaj disa nxënësve të një shkolle në Pejë. Me këto veprime i pandehuri kishte për të kryer veprën penale ‘’Përgatitja e veprave terroriste ose veprave penale kundër rendit kushtetues dhe sigurisë së Republikës së Kosovës’’, thonë nga Prokuroria Speciale.
j.l./ dita
