Detajet e nismës Balla-Bushka, PS projekton “lustracionin e kandidatëve” si kryefjalë të sesionit të ri parlamentar

Konferenca e  Kryetarëve miratoi të premten programin e punës dhe kalendarin e punimeve për sesionin e ri parlamentar, duke futur në rend dite dy nisma ligjore të PS-së:

1- bëhet i detyrueshëm verifikimi i lidhjeve me ish-Sigurimin e Shtetit para ’90 për çdo kandidat për deputet dhe kryebashkiak.

2- rishikim i “çertifikatave të pastërtisë” nga Autoriteti i Dosjeve.

Nismat janë propozuar nga kreu i grupit të PS-së, Taulant Balla dhe kryetarja e komisionit të Ligjeve, Klotilda Bushka, dhe u nxitën nga debati i muajit gusht për pastërtinë e figurës së ish-presidentit Ilir Meta.

Një shkresë e Autoritetit të Dosjeve drejtuar Kuvendit fliste për indicje që implikojnë Metën si bashkëpunëtor i ish-Sigurimit të Shtetit para ’90. Vetë Meta i hodhi poshtë akuzat dhe bëri padi penale për falsifikim dokumentash për anëtarët e bordit drejtues të AIDSSH-së të enjten.

Por nismat Balla-Bushka kërkojnë ndryshime në Kodin Zgjedhor dhe në Ligjin për Funksionimin e Autoritetit të Dosjeve.

“Kandidat është shtetasi që plotëson kushtet e parashikuara në nenet 45 dhe 69 të Kushtetutës, për të cilin përfundon me sukses procesi i verifikimit të pastërtisë së figurës, dhe që regjistrohet si kandidat për deputet, si kandidat për kryetar bashkie ose për këshillat vendor në organet përgjegjëse për administrimin e zgjedhjeve”- thuhet në draftin socialist për Kodin Zgjedhor.

Në nenet e tjera të draftit parashikohet dhe procesi i verifikimit të pastërtisë së figurës duke i detyruar subjektet zgjedhore që 70 ditë para zgjedhjeve parlamentare apo vendore të kërkojë verifikimin e kandidatëve pranë Autoritetit të Dosjeve “në lidhje me ekzistencën për të, të informacioneve në dokumente të ish-Sigurimit të Shtetit, për qëllime të transparencës së pastërtisë së figurës”.

Autotitetit të Dosjeve i jepet tagri që të kryejë procesin e verifikimit mbi bazën e listës zyrtare të kandidatëve pranë KQZ-së dhe nëse vetëdeklarimi i kandidatëve është i rremë ta përcjellë çështjen në KQZ dhe më tej në organet hetimore.

Projektligji tjetër i futur në kalendar po ashtu lidhet me kërkesën e AIDSSH-së për ndryshimin  e ligjit “Për të Drejtën e Informimit për dokumentat e Ish-Sigurimit të Shtetit të Republikës Popullore Socialiste të Shqipërisë”.

Ndryshimi i jep të drejtë Autoritetit që të fusë në sitë çertifikatat e pastërtisë së dhënë nga komisioniet “Mezini” dhe “Bezhani”, të ngritur pas viteve ’90.

Nisma ligjore propozon shfuqizimin e neneve që ndalonin deri më sot Autoritetin e Dosjeve që të merrte në administrim kërkesat për informacion për zyrtarët që propozohen të emërohen ose ngrihen në detyrë në institucionet kushtetuese dhe autoritetet publike kur ata kishin marrë “çertifikatën e pastërtisë së figurës” nga këto dy komisione.

E shkuara komuniste do të jetë pjesë e punës së Kuvendit në sesionin e ri dhe me disa nisma të deputetëve të Partisë Demokratike. Konferenca e kryetarëve ka përfshirë në kalendar dhe nismat ligjore të bëra publike nga kryetari i grupit të PD-së, Enkelej Alibeaj gjatë verës që lidhen me “dekomunistizimin, hapjen e plotë të dosjeve dhe kthimin në muze kombëtar të kamp-burgjeve të  të Spaçit dhe Tepelenës”.

i.b. / dita