Zbardhen detaje nga megaoperacioni i koduar “Camper” në Vlorë, ku u godit një organizatë e narkotrafikut ndërkombëtar. Katër shtetas rumunë janë arrestuar nga policia e Vlorës dhe 5 shqiptarë janë shpallur në kërkim pas aksionit, ku u sekuestruan 260 kilogramë kanabis me destinacion Greqinë. Në pranga kanë rënë rumunët; Marius Cimpeanu, Mihaela Cimpeanu, Florin Tucan dhe Andreea Pislaru.
Këta të fundit punonin për llogari të trafikantëve shqiptarë, të cilët janë shpallur në kërkim. Ndërkohë janë sekuestruar edhe 2 automjetet ‘Camper’ me targa rumune që ishin përshtatur për transportimin e lëndës narkotike. Rumunët, kamufloheshin si turistë dhe merrnin me qira automjete luksoze, të cilat më pas i përdornin për transportin e drogës drejt territorit grek.
Ndërkohë vijon puna për dokumentimin e plotë të këtij rasti, si dhe për kapjen dhe vënien përpara përgjegjësisë të bashkautorëve të tjerë shqiptarë tashmë të shpallur në kërkim, identitetet e të cilëve nuk zbulohen për arsye të hetimit.
