Banorët e Bërxullës protestuan edhe këtë të dielë.
Ata kërkojnë prej muajsh shpronësimin e drejtë sipas tyre të pronave që preken nga projekti i aksit Thumanë-Kashar.
Aksioni i sotëm nisi me bllokimin e rrugës së bashku me fëmijët e tyre.
Efektivët e policisë i rrethuan banorët teksa u kanë kërkuar që të lirojnë rrugën vazhdimisht, edhe pse ata kanë refuzuar kategorikisht. Një prej banoreve akuzoi policinë për dhunë, ndërsa një qytetar paralajmëroi se të dielën tjetër do vetëflijohet.
Qytetari tregoi se të dielën që vjen, do jetë i përgatitur me shkrepëse dhe një shishe benzinë për t’u vetëflijuar.
“Do marr shkrepsen dhe benzinën, jap fjalën se radhës tjetër do vetëflijohem. Unë e kam ndarë mendjen, për grevën e urisë nuk jam se jam i sëmurë. A doni ta dini se kush jam, shiheni…”, tha ai.
Po ashtu, banorët bënë të ditur se nga fundjava që vjen do futen në grevë urie.
Kjo nuk është protesta e parë që ndodh nga banorët e kësaj zonë lidhur me këtë shqetësim, pasi mësohet se ata nuk janë dakord me skemën e shpronësimit të pronave të tyre që preken nga projekti i rrugës.
Sipas tyre çmimi i tregut për pronat e tyre është rreth 50 euro për metër katror, ndërsa atyre u është ofruar një kompensim me rreth 4 euro për metër katror, gjë që ata e kanë refuzuar kategorikisht.
j.l./ dita
