Prokuroria e Posaçme kundër Korrupsionit dhe Krimit të Organizuar, SPAK, do të hetojë çështjen e gjetjes së pistoletave të kapura ditën e sotme në portin e Durrësit.
Dyshohet se armët e zbuluara do të transportoheshin në funksion të veprimtarisë së një grupi të strukturuar kriminal në Angli.
Rrezikshmëria që mbartin akte kriminale si trafiku ndërkombëtar i armëve, i mbetur në tentativë në këtë rast, si dhe zbulimi i aktivitetit të grupeve kriminale që veprojnë në Angli, do t’i transferojnë hetimet për këtë rast në Tiranë.
Strukturat e posaçme pritet të hetojnë në lidhje me trafikimin e armëve mbetur në tentativë dhe zbulimin e personave të tjerë të përfshirë në këtë ngjarje, duke nisur nga porositësit e mallit të ndaluar, blerësit, shitësit, transportuesit dhe për çfarë do të përdoreshin ato.
Një 35-vjeçar ka rënë në prangat e policisë, pasi në Portin e Durrësit iu gjetën armë në furgonin me të cilin ai po lëvizte.
Ndërsa është ndaluar Jetmir Koloshi, të cilit iu gjetën 8 pistoleta. Ngarkesa e dyshimtë u konstatua fillimisht kur mjeti ka kaluar në skaner dhe pas sinjalizimit nga punonjësit e skanerit.
Policia në port ka ushtruar kontroll fizik në furgonin tip Mercedes Benz, dhe në bagazh është konstatuar një tavolinë rreth 1 metër e gjysmë e gjatë, e mbështjellë me letër transparente. Në brendësi të tavolinës ndodheshin të fshehura 8 pistoletat dhe municion për to
m.b./dita
