Gjykata e Korçës la në paraburgim dy çiftin e turistëve rumunë, George Coman dhe Daniela Buturugaru, të cilët u kapën në pikën kufitare të Kapshticës katër ditë më parë, në tentativë për të kaluar me 118 kg lëndë narkotike të llojit kanabis sativa, që e kishin fshehur në mjetin e tyre tip ‘rulot’ (Camper), që e kishin marrë me qira. Për dy të dyshuarit 54 dhe 36 vjeç, u zhvillua seanca gjyqësore me dyer të mbyllura. Gjatë këtij momenti, George Coman ndryshe nga bashkëatdhetarja e tij, është shfaqur i qeshur, madje ka bërë edhe ironi me gazetarët, duke i pyetur nëse duket bukur në kamera. Ndërkohë avokati i të akuzuarve, ka deklaruar se klientët e tij nuk pranojnë të kenë lidhje në trafikun e drogës. Rumunët me profesion ndihmës kuzhinierë, kanë mohuar të kenë dijeni mbi kanabisin e gjetur në rulot dhe se janë thjeshtë turistë në Shqipëri.
Dy shtetasit rumunë tentuan ta trafikonin sasinë e drogës nëpërmjet kufirit me Greqinë, duke përdorur një automjet tip ‘rulot’, me qëllim për të kaluar në pikën kufitare të Kapshticës. Gjatë kontrollit të detajuar, duke përdorur edhe qenin antidrogë të Policisë, në pjesën e bagazhit të mjetit, u gjetën dhe u sekuestruan në cilësinë e provës materiale 79 pako me lëndë të dyshuar narkotike kanabis sativa, me peshë totale 118 kilogramë, për të cilën dëshmuan se nuk kishin dijeni, sepse mjetin e morën me qira. Avokati i tyre u shpreh se klientët që përfaqësonte nuk e pranonin të ishin fajtorë për atë çfarë akuzohen, duke theksuar se ishin thjesht turistë dhe nuk kishin dijeni për kanabisin e gjetur në automjet. Pak javë më parë u arrestuan edhe 2 çifte të tjera rumune që kishin ardhur si turistë dhe udhëtonin me dy kampera të mbushura me mbi 300 kg hashash, me destinacion Greqinë, kurse në kërkim u shpallën 5 të rinj nga Vlora.
