Një 41-vjeçar ka rënë në prangat e policisë së Pogradecit, pasi akuzohet se kishte planifikuar vrasjen e 3 personave me të cilët thuhet se kishte konflikt.
Burime nga policia bënë me dije se pas hekurave përfundoi Lorenc Kuqo, i cili ishte në kërkim pasi Gjykata e Lartë e ka dënuar me 7 vjet e 3 muaj burg.
Në vitin 2017, 41-vjeçari, pas konflikteve për motive të dobëta me 3 persona, kishte planifikuar që t’i vriste ata në ambientet e një lokali.
Ndërhyrja në kohë e Policisë, parandaloi ngjarjen e rëndë. Në atë kohë, Lorenc Kuqos iu sekuestruan 1 automatik kallashnikov, 1 automjet dhe 1 maskë.
Për këtë, Gjykata e Lartë e ka dënuar 41-vjeçarin me 7 vjet e 3 muaj burg, pasi kishte siguruar kushtet dhe mjetet për të vrarë tre personat.
