Mbrëmjen e sotme është bërë publik një dokument që vërteton se Dan Hutra nuk ka reflektuar dhe është vlerësuar si i parehabilituar edhe pas 1 viti burg për dhunë ndaj bashkëjetueses.
Madje ai ka qenë problematik gjatë qëndrimit në burg. Ky është përfundimi i një grupi prej 5 specialistësh nga ekzaminimi për sjelljen 6 mujore të të burgosurit Dan Hutra që mban datën 22 dhjetor 2022, më shumë se 2 muaj para se të kryente masakrën në Tiranë.
Sipas vlerësimit thuhet se ai është përpjekur të ndërtojë marrëdhënie korrekte me personelin e burgut dhe nuk ka krijuar konflikte, ndërkohë që në lidhje me marrëdhëniet me bashkëvuajtësit ka pasur shumë probleme.
“Gjatë kësaj periudhe të qëndrimit në Institucion i burgosuri nuk ka manifestuar sjellje e qëndrim korrekt Nuk ka zbatuar rregulloren si dhe nuk ka respektuar bashkëjetesën me të tjerët.
Nuk ka reflektuar gjendje të ekuilibruar psiko-emocionale, pasi është ndëshkuar me mase disiplinore Nr. 2563/1 J1.30.09.2022 me motivacion “Përdorime i fjalëve fyese ndaj bashkevuajtësve te tjerë” ndëshkuar me 5 ditë përjashtim nga të gjitha aktivitetet e përbashkëta, dhe Nr.26821 dt 11.10.2022 me motivacion “Përdorimi i fjalëve fyese ndaj bashkevuajtësve të tjerë ndëshkuar me 6 (gjashtë) dite përjashtim nga të gjitha aktivitetet e përbashkëta”, thuhet në aktin vlerësues.
Nga dokumenti, konstatohet se Hutra është shfaqur gjithmonë problematik, ai nuk ka respektuar rregulloren, është ndëshkuar disa herë për fyerje ndaj të burgosurve të tjerë.
Në dokument thuhet se komisioni i vlerësimit ka nënvizuar se Dan Hutra ka kryer aktivitete që bien në kundërshtim me Rregulloren e Përgjithshme të Burgjeve, si dhe me rregulloren e brendshme të Burgut “Jordan Misja”.
“Është i përfshire ne këshillimet individuale, duke u përpjekur të kontrollojë emocionet dhe gjendjen psiko-emocionale”, thuhet në dokument, i cili nënvizon se ai nuk është i përfshirë në veprimtari punësimi brenda institucionit.
Nuk shfaq nevoja për te trajtuar ne baze te programeve specifike Besimi fetar/ ndjekja e riteve fetare: Respekton besimet fetare por nuk i praktikon ato”, thuhet në dokument.
Ai vlerësohet se, me familjaret referon marrëdhënie të mira me te cilët komunikon rregullisht në telefon dhe ka pasur takime në SKYPE.
Vihet re se specialistët thonë se ai nuk paraqet rrezikshmëri për veten, domethënë psikoza vetëvrasëse ndërkohë që vihet theksi se “me sjelljen dhe qëndrimin aktual nuk krijon besueshmëri për një qëndrim korrekt edhe jashtë institucionit”.
m.b./dita
