Në fjalën e tij në Asamblenë e PS, kryeministri Rama deklaroi se pavarësisht protestave, molotovëve dhe akteve të dhunës, mazhoranca nuk e ka thënë ende fjalën e saj dhe se tashmë është koha që socialistët të komunikojnë drejtpërdrejt me qytetarët në të gjithë vendin.
Kreu i qeverisë u bëri thirrje socialistëve të dalin në çdo lagje dhe fshat për të zhvilluar biseda dhe debate me qytetarët, duke theksuar rëndësinë e dialogut dhe të dëgjimit të mendimeve ndryshe.
“Kanë folur, i kanë thënë të tëra, i kanë shkulur të gjitha gurët e bulevardit, i kanë hedhur molotovët. Por fjala jonë nuk është thënë akoma. Tani është koha të flasim ne. Të flasim në cdo lagje dhe në cdo fshat, të flasim me cdo shqiptar që nuk i friket dialogut, që do debatin dhe që nuk e ka harruar akoma atë që duan ta bëjnë ta harrojmë. Duan të na bëjnë të harrojmë që baza bashkëjetesës është liria për të folur, por edhe edhe e drejta për të dëgjuar. Një mandat si ky është një mision i ngarkuar nga një popull i tërë dhe nuk zhbëhet dot nga askush ky”, tha Rama.
Kryeministri Edi Rama tha se kërkesat për dorëheqjen e tij janë thjesht një iluzion. Në fjalën e tij në Asamblenë e PS, kreu i qeverisë deklaroi se ne protesta kishte edhe elementë të tjerë, duke përmendur “sorrat dhe korbat” dhe atë që i cilësoi si “duar të huaja”.
“Aty në atë protestë kishte nga të gjitha, pjesa më e rëndësishme për mua ishte mijëra qytetarë që i kishte sjellë pritshmëria më e lartë për gjerat që i shqetësojnë. Por që sorrat dhe korbat ishin pjese aty kjo, besoj është e qartë. Që duart e huaja ishin aty është po kaq e qartë. Nuk ka qenë as përqeshje dhe as anatemim. Iluzioni i largimit tim me dhunë, se ata nuk e kanë me mua, ata e kanë me ju, me PS. Unë jam thjesht pengesa më e madhe me manipulimi i madh që e shoqëruan atë iluzion kanë krijuar një shtresë toksike që ne duhet ta purifikojmë në territor me fjalën tonë, me faktet tona dhe me angazhimin tonë për të dëgjuar njerëzit.
Dhuna policore, një legjende urbane e jashtëzakonshme. Ndërkohë që mbetemi i vetmi vend me një raport të përmbysur të të lënduarve. Në Dublin para dy ditësh u prita atje me agjitim të madh. Ishin në trotuarin tjetër, rruga ishte bosh. Ata rrinin në trotuar”, tha Rama.
j.l./ dita
