Disa portale kanë sulmuar prokurorët e SPAK, të cilët janë marrë me hetimin që përfshin ish-ministrin Arben Ahmetaj.
Emri i Ahmetaj është lakuar shumë së fundmi. Sipas këtyre portaleve, ish-ministri është favorizuar nga SPAK dhe hetimet ndaj tij kanë qenë të paplota.
A qëndrojnë këto akuza publike? SPAK mohon në mënyrë të prerë.
Një deklaratë e së premtes pasdite thotë se pretendimet e ngritura në disa media nuk qëndrojnë dhe se qëndrimet e mbajtura nga prokurorët nuk janë personale të tyre, por të vetë SPAK.
SPAK i konsideron këto akuza si “sulme personale” ndaj prokurorëve dhe kërkon ndaljen e tyre.
“Veprimet proçedurale të prokurorëve të çështjes në lidhje me këtë proçedim penal nuk janë veprime dhe qëndrime të tyre personale, por përfaqësojnë qëndrimin dhe vendimin e institucionit të Prokurorisë së Posaçme kundër Korrupsionit dhe Krimit të Organizuar.
Gjyqtari i seancës paraprake me vendimin nr.21, datë 21.02.2023 ka vlerësuar se hetimet janë të plota.
Prokuroria e Posaçme kundërshton çdo tentativë për intimidim dhe sulme personale ndaj prokurorëve të posaçëm që synon t’i kufizojë ata nga kompetenca dhe përgjegjësia e tyre për të ushtruar ndjekjen penale sipas Kushtetutës dhe ligjit”, – thuhet ndër të tjera në reagimin e SPAK.
i.b. / media
