Një aksident dramatik, në zinxhir përplasjesh ndodhi mbrëmjen e sotme në qytetin e Vlorës, ku si pasojë një grua ndodhet ende në spital me dëmtime dhe nën kujdesin e mjekëve. Sipas burimeve policore dhe të dhënave paraprake hetimore, autor i dyshuar i ngjarjes është Arlind Lagji, ish-drejtori i Doganës së Fierit.
Lagji mësohet se ishte në drejtimin e një mjeti fuoristradë “Tuareg”, i cili fillimisht goditi një këmbësore dhe pasi u largua me shpejtësi nga skena e aksidentit të parë, në tentativë arratisjeje, goditi edhe një tjetër makinë në ecje, po në rrugën e njohur si Transballkanikja. Pas aksidentit të dytë, ish-zyrtari është ndalur nga forcat e rendit, ndërkohë që ende nuk dihen arsyet e ecjes së çmendur në një rrugë kaq të trafikuar.
Lagji u shkarkua nga posti shtetëror, pas një skandali ku një qytetar e akuzonte për dhunë dhe kërcënime me jetë, pas një lidhje jashtëmartesore që Lagji kishte me bashkëshorten e këtij të fundit.
