Konflikti me viktima nga të dyja palët, mes fiseve Lekstakaj dhe Nikulaj ka nisur që prej vitit 1996 kur mbeti i vrarë i pari vëllai i Ardian Nikulajt, Ismaili.
Në vitin 2007, britanikët refuzuan ekstradimin drejt Shqipërisë të Pjetër Lekstakaj, të cilin autoritetet shqiptare të asaj kohe e kërkonin si autor të vrasjes që e kishte kryer në vitin 2000.
Në një artikull të shkruar nga e përditshmja britanike “The Times” në vitin 2011, i cili trajton fenomenin e vrasësve shqiptarë që arrijnë t’i shpëtojnë ekstradimit duke gjetur hapësira në Britani përmes të drejtave të njeriut, mes 4 shqiptarësh, analizohet edhe Pjetër Lekstakaj.
Për të, “The Times” shkruan se ishin ligjet e të drejtave të njeriut që e ndihmuan që të mos ekstradohet.
“Ligjet e të drejtave të njeriut ndihmuan gjithashtu Pjeter Lekstakaj të fitonte një apel kundër ekstradimit në Shqipëri. Në vitin 2000, ai u shpall fajtor në mungesë për vrasjen e një fqinji pas një mosmarrëveshje për tokën në vitin 1999 dhe për armëmbajtje pa leje. Ai mori një dënim me 10 vjet burg”, shkuan e përditshmja britanike.
Më tej, gazeta britanike shkruan se Pjetër Lekstakaj ishte regjistruar fillimisht atje si shtetas kosovar, por në momentet që Apeli pranoi të mos ekstradohej, shfaqi probleme shëndetësore, përfshirë mungesën e shikimit, stres apo depresion, të cilat i përdori si argumenta për të mos u kthyer në Shqipëri.
“Lekstakaj, i cili tani është me shikim të pjesshëm dhe ecën me shkop, iku në Britani ku pozoi si refugjat kosovar dhe iu dha leja e pakufizuar për të qëndruar. Ai u arrestua në vitin 2007 pasi shqiptarët kërkuan ekstradimin e tij. Ai argumentoi se, sipas ligjeve të të drejtave të njeriut, ai duhej të qëndronte në Britani për t’u trajtuar për çrregullime të stresit post-traumatik dhe depresion. Gjykata ra dakord.
Në shtëpinë e tij në Birmingham, gruaja e Lekstakajt tha se burri i saj ishte shumë i shqetësuar për të folur dhe këmbënguli se ai ishte i pafajshëm. Ajo shtoi: “Ai po vuan nga stresi post-traumatik dhe është shumë i dëshpëruar për shkak të gjithçkaje që i ka ndodhur”, vijon “The Times”.
Duke cituar burime nga Interpol Tirana në vitin 2011, “The Times” shkuan se këto ligje po përdoren nga shqiptarët si mur për ndalim të ekstradimit.
“Një burim i Interpolit në kryeqytetin shqiptar, Tiranë tha: “Ligjet e të drejtave të njeriut po përdoren vetëm si mur për të ndaluar ekstradimin e disa prej kriminelëve më të kërkuar në Shqipëri”, thuhet në artikull.
Autoritetet shqiptare tashmë e kanë nisur kërkesën për ekstradimin e porositësit shqiptar Edmond Haxhia dhe katër anglezëve Steven Hunt, Thomas Mithan dhe Harriet Bridgeman, të arrestuar vetëm pak ditë pas arratisjes nga Shqipëria.
Në datën 5 maj nisin procedurat e ekstradimit, një proces që pritet të zgjas në të gjitha shkallët e gjyqësorit britanikë për të paktën 5 apo 6 muaj. Si shqiptari Haxhia dhe 3 britanikët, do të tentojnë edhe këtë herë që përmes manovrave të tjera të të drejtave të njeriut të mos ekstradohen.
Në kërkim për vrasjen e Ardian Nikulaj janë britaniku tjetër, Harry Simpson dhe vrasësi portugez Ruben Saraiva, që u larguan nga vendi ynë përmes pikës kufitare të Kapshticës. Kërkimet për ta vijojnë, por akoma nuk janë lokalizuar.
a.k. / dita
