Fantazia e kultivuesve shqiptarë të drogës ka arritur në një tjetër nivel. Një ish-tunel ushtrie në zonën e Krastës në Krujë, ishte përshtatur për kultivim të bimëve narkotike me anë të llambave. Ai u zbulua gjatë kontrolleve të policisë kundër kultivimit të bimëve narkotike në ambiente të hapura dhe të mbyllura.
Policia tha se brenda tunelit “u gjetën dhe u sekuestruan në cilësinë e provës materiale 390 bimë të dyshuara narkotike cannabis sativa, sistem ndriçimi me 30 llamba, 1 aspirator, 2 ventilatorë, si dhe pajisje të tjera që shërbejnë për kultivimin e bimëve narkotike”.
Po ashtu policia tha se kishte arrestuar shtetasit H. S., 61 vjeç dhe R. H., 58 vjeç, të dy banues në banues Halil, Krujë, si dhe A. S., 21 vjeç, banues Fushë Krujë.
Por policia arrestoi edhe dy punonjës të Operatorit të Shpërndarjes së Energjisë Elektrike OSHEE, të cilë dyshohet se kanë bërë lidhjen e paligjshme të tunelit me një nga linjat e tensionit që furnizonte fshatin Halil. Dy punonjës të tjerë, një përgjegjës i zonës dhe ekektricisti , janë shpallur në kërkim.
“Në vijim të veprimeve hetimore u konstatua se tuneli furnizohej me energji elektrike të pandërprerë, nëpërmjet një lidhjeje të paligjshme të energjisë elektrike, në shtyllën e tensionit në fshatin Halil, Fushë Krujë, lidhje për të cilën ka qenë e nevojshme patjetër ndërhyrja e specializuar e punonjësve të OSHEE-së së zonës”, njoftoi policia.
Por ndalimi i këtyre të fundit solli protestë të punonjësve të kompanisë publike. Ata bojkotuan punën dhe akuzuan policinë se po i penalizonte padrejtësisht.
“Ne jemi 70 punonjës dhe ne po penalizohemi dita ditës. Arsyet janë shtëpitë e barit që i organizojnë njerëzit e krimit dhe arrestohen punonjësit e OSHEE. Ndihemi të kërcënuar”, tha Bardhyl Syla, shef i ekipit të OSHEE në Krujë.
Materialet hetimore në lidhje me rastin i kaluan Prokurorisë, për veprat penale “Kultivimi i bimëve narkotike”, “Vjedhja e energjisë elektrike” dhe “Shpërdorimi i detyrës”.
j.l./ dita
