Përpjekjet e emigrantëve të paligjshëm për të çarë ‘rrjetën’ e Policisë Kufitare në porte, aeroporte dhe pikat tokësore, janë bërë të zakonshme, pasi Shqipëria shihet si një portë tranzit e përshtatshme. Tre persona janë arrestuar nga Policia në Portin e Durrësit, pasi janë kapur në tentativë për të kaluar kufirin me dokumente të falsifikuara. Në pranga kanë rënë Sh. H., 37 vjeç, F. H., 23 vjeç, të dy banues në Kosovë dhe M. S., 39 vjeç, banues në Turqi.
Pas dyshimeve se kishin qëllim të dilnin jashtë Shqipërisë me dokumente të rreme, ndaj tre të arrestuarve u kryen kontrolle më të detajuara të cilat provuan se dyshimet ishin të vërteta. Ndaj tyre rëndon akuzat për veprën penale “falsifikimi i letërnjoftimeve, i pasaportave ose i vizave”.
Paralelisht po bëhen verifikime me organet ligjzbatuese homologe, për të mësuar më shumë rreth të kaluarës së personave, nëse ishin në kërkim apo me precedentë dhe qëllimi i emigrimit ilegal.
