Një konflikt pronësie mes dy vëllezërve në Lezhë përfundoi me plagosjen me sende të forta të njërit prej tyre. Ngjarja ndodhi rreth orës 08:00 të mëngjesit, në fshatin Mërqi, ndërsa i plagosur mbeti Alfred Leka, rreth 40-vjeç. Ai mori lëndime nga goditjet me grushte dhe sende të forta dhe u dërgua për ndihmë mjekësore në spitalin rajonal të Lezhës, nga ku mësohet se ndodhet nën kujdesin e bluzave të bardha dhe jashtë rrezikut për jetën. Sipas deklarimeve të 40-vjeçarit, ka qenë duke lëvizur me makinë së bashku me familjen, kur i është zënë pritë dhe sulmuar.
Policia vendore njoftoi se nisi hetimet për sqarimin e rrethanave dhe motiveve të konfliktit mes dy vëllezërve. Ata po merren në pyetje në lidhje me rastin, ndërsa nga veprimet paraprake rezulton se ishin në konflikt prej kohësh, për kufirin ndarës të tokës në afërsi të banesave të tyre.
