Prokurorët rusë në gjyqin e një ish-gazetari i kërkuan gjykatës të martën t’i jepte një dënim me 24 vjet burg për akuzat për tradhti.
Ivan Safronov, i cili punoi si gazetar për një dekadë përpara se të bëhej këshilltar i kreut të korporatës ruse të hapësirës Roscosmos, është në paraburgim që nga arrestimi i tij në korrik 2020 në Moskë. Ai ka hedhur poshtë akuzat për dhënien e sekreteve ushtarake tek inteligjenca çeke dhe ka insistuar në pafajësinë e tij.
Rasti i Safronov pasqyron sfidat me të cilat përballen gazetarët rusë, të cilat janë bërë edhe më të ashpra mes aksionit ushtarak të Moskës në Ukrainë.
Safronov, i cili mbulonte çështjet ushtarake dhe të sigurisë për të përditshmen kryesore ruse të biznesit Kommersant përpara se të bashkohej me Roscosmos, deklaroi se ai kishte mbledhur të gjithë informacionin nga burime të hapura gjatë punës së tij dhe nuk bëri asgjë të paligjshme. Ai ka argumentuar se hetuesit nuk kanë arritur të shpjegojnë akuzat për tradhti dhe se cilat sekrete dyshohet se kishte zbuluar.
Shumë gazetarë rusë dhe aktivistë të të drejtave të njeriut kanë kërkuar lirimin e Safronov dhe disa kanë pretenduar se autoritetet mund të kenë dashur të hakmerren për raportimin e tij që ekspozoi incidentet ushtarake ruse dhe marrëveshjet e dyshimta të armëve.
Roscosmos ka thënë se Safronov nuk kishte akses në sekretet shtetërore dhe pretendoi se akuzat nuk kishin të bënin me punën e Safronov për korporatën, së cilës ai iu bashkua në maj 2020.
Aktivistët e të drejtave, gazetarët, shkencëtarët dhe zyrtarët e korporatave që janë përballur me akuza për tradhti në Rusi në vitet e fundit e kanë pasur të vështirë të mbrohen për shkak të fshehtësisë që rrethon rastet e tyre dhe mungesës së aksesit publik në informacion.
a.m/dita
