“Burimi na njofton se…” Hakerat publikojnë emailin sekret të firmosur nga Nano për takimet e botës së krimit

Në muajin gusht të vitit 2021, Njësia Anti-Terror, e cila drejtohej nga Gledis Nano ka mbledhur informacione për të shumëkërkuarin Talo Çela.

Në një email të publikuar nga hakerat, që mban firmën e Gledis Nanos, thuhet se Talo Çela, i cili është parë në Tiranë gjatë muajve korrik dhe gusht të vitit të kaluar, ka kontakuar me Ervin Matën.

Sipas burimit, Ervin Matës i është thënë se Talo Çela ka shumë kundërshtarë dhe se mund ta vrasin.

Burimi i informacionit dyshon se Ervin Mata mund ta përdorë Talon për të eliminuar ndonjë nga kundërshtarët e tij.

“Më datën 5 Gusht 2021 pas orës 20.00 ai ka shkuar tek Hotel Viktoria-s Rooms me adresë  tek Rruga e Dibrës. Atje ai ka shkuar i shoqëruar nga tre persona të tjerë të cilët kishin në përdorim një mjet tip golf ngjyrë gri, kurse vetë udhëton me një mjet tip Audi Q8 ngjyrë blu të errët me targa gjermane.

Burimi ka informuar se në këtë objekt, Talo Cela ka qenë dhe para dy javësh, rreth datave 25-26 korrik 2021. Herën e parë, Talo është parë në makinë me një femër dhe një fëmijë kurse më datën 5 ka qenë vetëm. Sipas informacionit, Talo Çela ka marrë kontakt me shtetasin Ervin Mata.

Sipas burimit, Ervinit i kanë thënë se me këtë duhet pasur kujdes se ka shumë kundërshtarë dhe se mund ta vrasin. Ervini i është përgjigjur që le të bëjnë çfarë të duan, për mua ka rëndësi që të mos më ndodhë ngjarje tek objekti im.

Burimi dyshon se Ervin Mata mund ta përdorë Talon për të eliminuar ndonjë nga kundërshtarët e tij. Ju bëjmë me dije se nga ana jonë është këmbëngulur se sa të sigurt e ka burimi këtë informacion dhe ai ka ngulur këmbë se është tepër e sigurt për këto takime dhe personi që e ka vënë në dijeni është lidhje e afërt e Ervin Matës dhe ngul këmbë që të ruhet pasi është një ndër personat e pakët që ka dijeni për takimet e Talos me Ervin Matën”, thuhet në shkresë.

Talo Çela akuzohet për një mori vrasjesh në Shqipëri, ndërsa prishja e pazareve me Nuredin Dumanin i ktheu aleatët e djeshëm në armiq të betuar.

Policia dyshon se Dumani erdhi pikërisht për të ekzekutuar Talo Çelën në maj të vitit 2022, por u tradhtua dhe Talo Çela u kthye t’i bënte atentat duke e plagosur.

o.j/dita