Specializantët e mjekësisë që përfundojnë gjatë këtij viti ciklin e tretë të studimeve, do të mund të punësohen në të gjitha strukturat publike shëndetësore të vendit, edhe pse ata nuk kanë një kontratë me Ministrinë e Shëndetësisë dhe Mbrojtjes Sociale. Në një takim të zhvilluar me specializantët, ministrja e Shëndetësisë, Ogerta Manastirli u ka bërë me dije atyre mundësitë e punësimit në të gjithë sektorin shëndetësor publik të vendit.
Rreth 200 mjekë specialistë kanë përfunduar këtë vit specializimin. 60 prej tyre do të atashohen në spitalet rajonale, me kontratë me Ministrinë e Shëndetësisë dhe Mbrojtjes Sociale, teksa për 140 mjekët e tjerë specialistë, do të garantohen alternativa punësimi në strukturat shëndetësore publike nga veriu në jug.
“Sot kam kërkuar këtë takim me ju për t’ju ftuar të bëheni pjesë e sistemit shëndetësor publik në spitalet tona në mbarë vendin, nga veri në jug, dyert për ju janë hapur dhe mezi ju presin kolegët tuaj, mjekët që tashmë janë specializuar së bashku me ju dhe kanë një kontratë të lidhur me MSHMS, sipas nevojave të vendit, duke u atashuar në spitalet tona rajonale dhe bashkiake”,- tha Ministrja Manastirliu në fjalën e saj.
Ministrja u ndal edhe tek investimet në sistemin shëndetësor që po vijojë aktualisht jo vetëm në spitale, por edhe poliklinika, si dhe qendra shëndetësore, ndërkohë foli edhe për rritjen e pagave në sektorin e shëndetësisë.
“Rritja historike e pagave për mjekët specialist, është edhe një motivim për mjekët e rinj që të japin më të mirën nga vetja. Rritja e pagave për mjekët specialistë me 50.000 lekë të reja është një mbështetje e cila rrit nivelin e profesionistëve dhe gjithashtu angazhon më shumë forcën e dedikuar në sistemin shëndetësor publik. Ne do të vijojmë rritjen e pagave edhe për vitin 2024 për mjekët e familjes edhe për infermierët me një mbështetje të targetuar, njësoj sikurse e bëmë me mjekët specialistë”, deklaroi Manastirliu.
p.k\dita
