Eksportet ngadalësohen sërish, përjashtim bëjnë tekstilet dhe këpucët

Rritja e eksporteve është ngadalësuar sërish, teksa sektori po vuan pasojat e krizës globale dhe kostove të larta të energjisë.

Në muajin tetor eksportet e mallrave arritën vlerën 38 mld lekë, duke u rritur me 12.5 %, në krahasim me të njëjtën periudhë të një viti më parë dhe duke u ulur me 0.8 %, në krahasim me shtatorin e 2022-shit. Zgjerimi më i ulët i këtij viti, sipas të dhënave të INSTAT.

Ndërsa importet e mallrave arritën vlerën 83 mld lekë, duke u rritur me 8.6 %, në krahasim me një vit më parë dhe duke u ulur me 5.3 %, në krahasim me shtatorin.

Peshën kryesore në rritjen e eksporteve në tetor vijuan ta mbanin tekstilet e këpucët(6.9%), ndërsa për të dytin muaj ishin në tkurrje shitjet e materialeve të ndërtimit e metaleve(-3.2%), që deri tani ishin një nga nxitësit kryesorë të eksporteve.

Janë ngadalësuar ndjeshëm dhe eksportet e mineraleve, lëndëve djegëse dhe energjisë, një sektor i goditur nga rritja e kostove, sidomos të energjisë.

Në këtë nëntëmujor eksportet e mallrave arritën vlerën 404 miliardë lekë, duke u rritur me 35%, nga mbi 50% që ishte zgjerimi në muajt e parë të vitit.

Fasoni përshpejtohet sërish

Tekstilet dhe këpucët kanë parë rritje të porosive, por problem mbetet fuqia punëtore.

Para disa ditësh, Edvin Prence, kreu i shoqatës “Pro Export Albania” tha për Gazetasi.al se sektorit i mungojnë aktualisht 20 mijë punëtorë dhe kjo krizë nuk po zbutet as nga punonjësit e vendeve të treta.

Ai shtoi se frika dhe paqartësia për të ardhmen mund të sjellë një ngërç dhe ulje të porosive, maksimumi nga janar-shkurti.

Sipas INSTAT, eksportet e grupit “Tekstile dhe këpucë”, që janë grupi më i madh në vend, me 27% të totalit, u rritën me 22% për 10 mujorin, duke përshpejtuar sërish ritmet (zgjerimi ishte 19.7% me bazë vjetore për 9 mujorin).

Materialet e ndërtimit dhe metalet kanë shënuar rënie për të dytin muaj radhazi, duke u tkurrur me 13.2% në tetor.

Për 10 mujorin, ky grup është rritur me 43%, si rrjedhojë e çmimeve të larta që i kanë nxitur eksportet në vlerë në pjesën e parë të vitit.

Ngadalësohen mineralet dhe lëndët djegëse, ushqimet rritje e ngadaltë

“Mineralet, lëndë djegëse, energjia” ngadalësuan sërish ritmet e rritjes në tetor, duke u zgjeruar me 13.6%, nga mbi 50% në gusht.  Eksporti i ushqimeve dhe pijeve u rrit me 14.7% për 10 mujorin, nga 20% në 5-mujor.

Thellohet deficiti

Sipas INSTAT, deficiti tregtar i këtij muaji është 45 miliardë lekë, duke u rritur me 5.5%, krahasuar me të njëjtin muaj të vitit të shkuar dhe duke u ulur me 8.7%, në krahasim me shtatorin e këtij viti.

Për 10 mujorin, deficiti tregtar arriti vlerën 374 miliardë lekë, duke u rritur me 12.4%, krahasuar me të njëjtën periudhë të 2021.</p>

Rriten eksportet me Italinë, bien me Kosovën

Sipas INSTAT, në tetor vendet me të cilët Shqipëria ka pasur rritje më të madhe të eksporteve, në krahasim me tetorin e 2021-shit janë: Itali (20.3%), Gjermani (34.4%) dhe Maqedoni (3.5%).

Ndërsa vendet me të cilat eksportet kanë pasur uljen më të madhe, janë: Kosova (13.8%) ,Spanja (13.4%) dhe Greqia (16.9%).

Shkëmbimet tregtare me vendet e BE-së zënë 60.2% të gjithë tregtisë.

Gjatë tetorit eksportet drejt vendeve të BE-së zënë 76.9% të eksporteve gjithsej dhe importet nga vendet e BE-së zënë 52.6% të importeve gjithsej.

Partnerët kryesorë tregtarë janë: Italia (29.6%), Turqia (8.2%), Greqia (6.7%) dhe Kina (6.3%).

Shkëmbimet tregtare, për dhjetëmujorin 2022, me vendet e BE-së zënë 59.6% të gjithë tregtisë./ Gazeta Si

a.m/dita